విజయవాడ (క్రైం), జనవరి 13: కల్తీ మద్యం కేసులో అరెస్టయి జైలులో ఉన్న కాంగ్రెస్ పార్టీ మాజీ ఎమ్మెల్యే, నగర కాంగ్రెస్ అధ్యక్షుడు మల్లాది విష్ణును పోలీసు కస్టడీకి కోర్టు అనుమతించింది. ఈమేరకు విజయవాడ రెండో అదనపు చీఫ్ మెట్రోపాలిటన్ మేజిస్ట్రేట్ బుధవారం ఉత్తర్వులు జారీ చేశారు. కృష్ణలంక స్వర్ణ బార్‌లో మద్యం సేవించి గత ఏడాది డిసెంబర్ 7న ఐదుగురు వ్యక్తులు మృత్యువాత పడిన విషయం తెలిసిందే.

హైదరాబాద్, జనవరి 13: ఆంధ్రప్రదేశ్‌లో హైవోల్టేజి విద్యుత్ పంపిణీ పథకాన్ని అమలు చేయనున్నారు. సామర్థ్యంలేని పంపుసెట్లను మార్చి వాటి స్థానంలో నాణ్యమైనవి అమర్చి, విద్యుత్‌ను ఆదాచేయడం ఈ పథకం లక్ష్యం. ఇది నిజంగా రైతులకు శుభవార్తే. జపాన్ ఇంటర్నేషనల్ కో ఆపరేటివ్ ఏజన్సీ మంజూరు చేసిన రూ.294.75 కోట్లతో మొదట దీనిని ప్రారంభిస్తారు.

శ్రీశైలం, జనవరి 13: శ్రీశైల మహాక్షేత్రంలో జరుగుతున్న సంక్రాంత్రి బ్రహ్మోత్సవాల్లో భాగంగా రెండవ రోజు బుధవారం ఆది దంపతులకు భృంగివాహన సేవ నిర్వహించారు. తొలుత స్వామి, అమ్మవార్లకు విశేష పూజలు నిర్వహించారు. యాగశాలలో చండీశ్వరస్వామికి ప్రత్యేక పూజలు, లోకకల్యాణం కోసం జపాలు చేపట్టారు. ఆగమశాస్త్రానుసారం రుద్రహోమం నిర్వహించారు. సాయంత్రం స్వామి, అమ్మవార్లు భృంగి వాహనంపై భక్తులకు దర్శనమిచ్చారు.

మార్కాపురం, జనవరి 13: ఉద్యోగం వస్తుందనే పేరాశతో భర్తను భార్య హత్య చేయించిన సంఘటన ఆలస్యంగా వెలుగులోకి వచ్చింది. ఓ హత్యకేసు విచారణ జరుపుతున్న సమయంలో ఈ హత్య కేసు బయటపడినట్లు ప్రకాశంజిల్లా మార్కాపురం డివైఎస్పీ శ్రీహరిబాబు తెలిపారు. బుధవారం సాయంత్రం తన కార్యాలయంలో ఆయన విలేఖరులతో మాట్లాడుతూ 2009 ఆగస్టు 9న ఈసంఘటన జరిగినట్లు తెలిపారు.