హైదరాబాద్: కార్తీక పౌర్ణమి పర్వదినం సందర్భంగా ఆంధ్ర, తెలంగాణాల్లో ప్రముఖ శైవ క్షేత్రాలు బుధవారం భక్తులతో కిటకిటలాడుతున్నాయి. తెల్లవారుజాము నుంచే భక్తులు భారీ సంఖ్యలో శివాలయాలకు చేరుకొని పూజాదికాలు నిర్వహిస్తున్నారు. భద్రాచలం వద్ద గోదావరిలో వేలాదిమంది భక్తులు పుణ్యస్నానాలు ఆచరించారు. గుంటూరు జిల్లా బాపట్ల సమీపంలోని సూర్యలంక సాగర తీరంలో వేలాదిగా భక్తులు పుణ్యస్నానాలు చేశారు.

విజయవాడ : పోలవరం ప్రాజెక్టుపై వున్న పర్యావరణ ఆంక్షలన్నీ శాశ్వతంగా రద్దుచేయాలని సీఎం చంద్రబాబు కోరారు. మంగళవారం పార్లమెంటు సభ్యులతో సీఎం భేటీ అయ్యారు. ఈ సందర్భంగా ఆయన మాట్లాడుతూ వచ్చే నాలుగేళ్లలో పోలవరం ప్రాజెక్టును పూర్తిచేస్తామని తెలిపారు.

నెల్లూరు: గూడూరు మండలం తిప్పవరపాడు వద్ద వాగులో సోమవారం గల్లంతయిన నలుగురిలో ముగ్గురి మృతదేహాలు మంగళవారం ఉదయం లభ్యమయ్యాయి. ఈ ఘటనలో ఓ వ్యక్తిని సోమవారం నాడు స్థానికులు రక్షించారు. వాగులో మునిగి తన కుమార్తె రమణమ్మ మృతి చెందినట్లు తెలిసాక ఆమె తండ్రి హఠాత్తుగా గుండెపోటుకు లోనై మరణించాడు. తండ్రీ కుమార్తెల మరణంతో ఆ కుటుంబంలో విషాద ఛాయలు అలముకున్నాయి

చిత్తూరు: పెద్దతిప్ప సముద్రం మండలంలో ఉధృతంగా ప్రవహిస్తున్న పాపాగ్ని నదిలో మంగళవారం ఉదయం 30 మంది కూలీలు చిక్కుకొన్నారు. వీరిని కాపాడేందుకు స్థానికులు సహాయక చర్యలు ప్రారంభించారు.