విజయవాడ : ఇసుక తక్కువ ధరకు అందించాలన్నదే ప్రభుత్వ లక్ష్యమని ముఖ్యమంత్రి చంద్రబాబు నాయుడు తెలిపారు. రాష్ట్రంలో ఇసుక విధానంపై చంద్రబాబు గురువారం శ్వేత పత్రం విడుదల చేశారు. రాష్ట్రంలో 387 ఇసుక రీచ్ ల గుర్తించినట్లు చెప్పారు. ఇందులో 368 రీచ్ లలో తవ్వకాలు జరుగుతున్నట్లు చంద్రబాబు తెలిపారు.

శ్రీకాకుళం: వజ్రపుకొత్తూరు మండలం అక్కుపల్లి వద్ద సముద్ర తీరానికి గురువారం ఉదయం 67 ఏళ్ల వృద్ధుడి మృతదేహం కొట్టుకు వచ్చింది. వృద్ధుడిని రిటైర్డ్ టీచర్ అప్పలస్వామిగా గుర్తించారు. ఇతను కొద్దిరోజులుగా కనిపించటం లేదని, పోలీసులు తెలిపారు. అప్పలస్వామి సముద్రంలో పడి ఆత్మహత్య చేసుకొని ఉండచ్చని పోలీసులు అనుమానిస్తున్నారు.

నెల్లూరు: ఎ.పి. సి.ఎం. చంద్రబాబు తప్పుడు వాగ్దానాలతో ప్రజలను వంచిస్తూ పాలిస్తున్నారని వైకాపా అధ్యక్షుడు జగన్మోహన్‌రెడ్డి ఆరోపించారు. నెల్లూరు జిల్లాలో వరద బాధితులను పరామర్శించిన సందర్భంగా ఆయన మీడియాతో మాట్లాడుతూ రైతుల నుంచి బలవంతంగా భూములు లాక్కుంటే తాము చూస్తూ ఊరుకోమన్నారు. ప్రభుత్వ స్థలాల్లో గుడిసెలు వేసుకున్న వారికి పక్కా ఇళ్లు నిర్మించాలని వారు డిమాండ్ చేశారు.

విశాఖ: దక్షిణ అండమాన్ సముద్రం పరిసర ప్రాంతాల్లో స్థిరంగా ఉన్న ఉపరితల ఆవర్తనం మరింత బలపడి అల్పపీడనంగా మారే అవకాశాలు ఉన్నందున దక్షిణ కోస్తాలో విస్తారంగా వర్షాలు కురుస్తాయి. తమిళనాడు, పుదుచ్చేరి, అండమాన్‌లలో కూడా వర్షాలు కురిసే అవకాశం ఉందని వాతావరణ శాఖ అధికారులు తెలిపారు.