హైదరాబాద్: దాదాపు నెల రోజుల విరామం అనంతరం ఎ.పి. సి.ఎం. చంద్రబాబు శనివారం ఉదయం ఇక్కడి సచివాలయానికి వచ్చి వివిధ శాఖల అధికారులతో సమీక్ష జరిపారు. వివిధ సంక్షేమ పథకాలు, వాటి లక్ష్యాలకు సంబంధించి ఆయన ఆరా తీశారు. పలువురు మంత్రులు కూడా ఈ సందర్భంగా హాజరయ్యారు.

నెల్లూరు : ఆనం సోదరులు టిడిపిలో చేరేందుకు చంద్రబాబు గ్రీన్ సిగ్నల్ ఇవ్వటంతో శుక్రవారంనాడు ఆనం సోదరులు మీడియా సమావేశాన్ని ఏర్పాటుచేశారు. ఈ సందర్భంగా ఆనం వివేకానందరెడ్డి మాట్లాడుతూ సామాజిక బాధ్యతతోనే టిడిపిలో చేరాలని నిర్ణయించినట్లు తెలిపారు. ఆనం నారాయణ రెడ్డి మాట్లాడుతూ ప్రజాసేవే తమ లక్ష్యమని వెల్లడించారు.

హైదరాబాద్ : హైదరాబాద్ లో నలుగురు సభ్యుల డ్రగ్స్ ముఠాను టాస్క్ ఫోర్స్ పోలీసులు అరెస్టు చేశారు. గోవా నుంచి డ్రగ్స్ తీసుకుని హైదరాబాద్ లో విద్యార్థులకు విక్రయిస్తుండగా వారిని పోలీసులు పట్టుకున్నారు. ముఠా నుంచి భారీగా డ్రగ్స్ ను స్వాధీనం చేసుకున్నారు.

చిత్తూరు: గుడుపల్లి మండలం బోయినపల్లి, చినపర్తికుంట, సంగనపల్లి తదితర గ్రామాల్లో శుక్రవారం తెల్లవారుజామున ఏనుగులు బీభత్సం సృష్టించాయి. పొలంలో నిద్రిస్తున్న ముగ్గురు రైతులపై ఏనుగులు దాడి చేయగా, ఇద్దరు తీవ్రంగా గాయపడ్డారు. గాయపడిన వారిని ఆస్పత్రికి తరలించి గ్రామస్థులు అటవీ శాఖ అధికారులకు సమాచారం చేరవేశారు.