కడప: పీఎఫ్‌ కార్యాలయంలో పింఛను సొమ్మును స్వాహా చేసిన కేసులో ఒకటో పట్టణ పోలీసులు ముగ్గురు విశ్రాంత ఉద్యోగులను పోలీసులు అదుపులోకి తీసుకొని రిమాండ్‌కు తరలించారు. పరారీలో వున్న మరో ఉద్యోగి ఆచూకీ కోసం గాలింపు చర్యలు చేపట్టారు. నిందితుల నుంచి రూ.9లక్షల నగదు, రెండు ఏటీఎం కార్డులను స్వాధీనం చేసుకున్నారు.

కర్నూలు : నంద్యాల ఎంపీ ఎస్పీవై రెడ్డి కుమార్తె సుజలతో పాటు మరో ఇద్దరిపై హత్యకేసు నమోదయ్యింది. నంది అకాడమీలో పీఆర్వోగా పనిచేసిన సుమంత్ హత్య కేసులో ఎంపీ కూతురిని అరెస్ట్ చేయాలని పలు ప్రజాసంఘాలు డిమాండ్ చేశారు. సుజల సూచన మేరకు మురళి, షఫీ అలీ అనే ఇద్దరు సుమంత్‌ను దారుణంగా కొట్టి చంపినట్లు మృతుడి బంధువులు ఫిర్యాదు చేశారు. దీంతో వారిపై హత్యకేసు నమోదు చేసినట్లు పోలీసులు చెప్పారు.

విజయవాడ: జపాన్‌ మినిస్ట్రీ ఆఫ్‌ అగ్రికల్చర్‌, ఫారెస్ట్రీ, ఫిషరీస్‌తో ఒప్పందాలు చేసుకున్నామని సీఎం చంద్రబాబు తెలిపారు. జపాన్‌ బృందంతో సీఎం చంద్రబాబు సమావేశమయ్యారు. ఏపీలో ఫుడ్‌వాల్యూ చెయిన్‌ ఫుడ్‌ ఇండస్ట్రియల్‌ పార్క్‌ ఏర్పాటుకు ఎంఏఎఫ్‌ఎఫ్‌ సహకారం అందిస్తుందని సీఎం తెలిపారు. అంతర్జాతీయస్థాయిలో పేరొందిన శిక్షణాసంస్థల ద్వారా యువతీ యువకులకు నైపుణ్య శిక్షణ ఇస్తామన్నారు.

విజయవాడ: కృష్ణా పుష్కరాల సందర్భంగా ప్రజలకు మెరుగైన సేవలు అందించేందుకు విస్తృత సన్నాహాలు చేస్తున్నామని ఎపి డిజిపి నండూరి సాంబశివరావు శనివారం మీడియాకు తెలిపారు. భక్తుల రద్దీ దృష్ట్యా వివిధ ప్రాంతాల్లో వాహనాలకు పార్కింగ్ స్థలాలు కేటాయించామని, ఘాట్‌ల వద్దకు నేరుగా వాహనాలను అనుమతించేది లేదన్నారు. ఘాట్‌లకు కనీసం కిలోమీటర్ దూరంలో వాహనాలను నిలపాలన్నారు.