హైదరాబాద్: పోలీసు శాఖలో మరో 332 కానిస్టేబుల్ పోస్టులను భర్తీ చేసేందుకు తెలంగాణ ప్రభుత్వం శుక్రవారం నోటిఫికేషన్ విడుదల చేసింది. పోలీసు శాఖలోని కమ్యూనికేషన్ విభాగంలో ఈ ఖాళీలను భర్తీ చేస్తారు. ఈ నెల 25 నుంచి మార్చి 15 వరకూ అభ్యర్థులు ఆన్‌లైన్‌లో దరఖాస్తులను సమర్పించాల్సి ఉంటుంది.

సికిందరాబాద్: సికిందరాబాద్‌లోని ప్రభుత్వ గాంధీ ఆస్పత్రిలో శుక్రవారం ఉదయం తెలుగురాష్ట్రాల గవర్నర్ నరసింహన్ ఆకస్మిక తనిఖీలు జరిపారు. వైద్యసేవలు, పరిశుభ్రత, వైద్యుల పనితీరు వంటి విషయాలపై ఆయన రోగులను ప్రశ్నించి వివరాలు తెలుసుకున్నారు.

హైదరాబాద్: జెఎన్‌యు విద్యార్థి కన్నయ్యను అరెస్టు చేయడాన్ని నిరసిస్తూ వామపక్ష పార్టీకి చెందిన విద్యార్థి సంఘాలు రాజ్‌భవన్ ముట్టడికి పిలుపు నివ్వడంతో శుక్రవారం పోలీసులు భారీ బందోబస్తు ఏర్పాటు చేశారు. రాజ్‌భవన్ పరిసరాల్లో ఎవరినీ అనుమతించకుండా కట్టడి చేశారు.

హైదరాబాద్: నగరంలోని ఎ.పి. సచివాలయంలోని ‘ఎల్’బ్లాక్ రెండో అంతస్థులో శుక్రవారం ఉదయం స్వల్ప అగ్నిప్రమాదం జరిగింది. విద్యుత్ షార్ట్ సర్క్యూట్‌వల్లే మంటలు వ్యాపించాయని తెలుస్తోంది. సమాచారం తెలిసిన వెంటనే అగ్నిమాపక సిబ్బంది చేరుకొని మంటలను అదుపు చేశారు. వికలాంగ సంక్షేమ శాఖ కార్యాలయంలో ఈ ఘటన జరిగింది.