హైదరాబాద్: గోదావరి పుష్కరాలు నిర్వహించినట్టే కృష్ణా పుష్కరాలూ ఘనంగా నిర్వహించాలని ప్రభుత్వం నిర్ణయించింది. వేద పండితులు నిర్ణయించిన మేరకు ఈ ఏడాది ఆగస్టు 12నుంచి 23వరకు కృష్ణా పుష్కరాలు నిర్వహించాలని సిఎం కె చంద్రశేఖర్‌రావు నిర్ణయించారు. ముఖ్యమంత్రి జన్మదినం సందర్భంగా క్యాంపు కార్యాలయంలో బుధవారం నిర్వహించిన ఓ కార్యక్రమంలో ఈమేరకు నిర్ణయించారు.

హైదరాబాద్: నగరంలోని జూబ్లీహిల్స్‌లో ప్రఖ్యాతి చెందిన పెద్దమ్మగుడిని తెలంగాణ సిఎం కెసిఆర్ తన జన్మదినం సందర్భంగా బుధవారం సందర్శించి మొక్కులు చెల్లించుకున్నారు. అమ్మవారికి ఆయన పట్టువస్త్రాలను సమర్పించి తీర్థప్రసాదాలను స్వీకరించారు. ఆయన వెంట పలువురు మంత్రులు, ఎమ్మెల్యేలు, అధికారులు పాల్గొన్నారు.

వరంగల్:వరంగల్ జిల్లా మేడారంలో సమ్మక్క-సారలమ్మ జాతరకు భక్తులు పోటెత్తారు. బుథవారంనాడు హైదరాబాద్‌నుంచి ప్రత్యేక హెలికాప్టర్‌లో మేడారం చేరుకున్న తెలంగాణ హోంమంత్రి నాయిని నర్సింహారెడ్డి, కుటుంబ సభ్యులు అమ్మవార్ల గద్దెవద్ద మొక్కులు చెల్లించుకున్నారు. జాతర సందర్భంగా చేసిన ఏర్పాట్లను విహంగవీక్షణంలో పరిశీలించారు.

హైదరాబాద్: నగర శివారులోని ఘట్‌కేసర్ ఆంధ్రాబ్యాంకులో భారీ చోరీపై ఖాతాదారుల ఫిర్యాదు మేరకు పోలీసులు ఆ బ్యాంకు చైర్మన్, ఎండి, చీఫ్ సెక్యూరిటీ ఆఫీసర్, బ్రాంచి మేనేజర్‌పై కేసులు నమోదు చేశారు. బ్యాంకులో తాము చేసిన డిపాజిట్లకు భద్రత లేకుండా పోయిందని కొందరు ఖాతాదారులు ఫిర్యాదు చేయడంతో పోలీసులు ఈ చర్య తీసుకున్నారు.