హైదరాబాద్‌: 70 ఏళ్ల స్వాతంత్య్రం, అమరవీరుల త్యాగఫలం అనే నినాదంతో నగరంలో శనివారం తిరంగా రన్‌ అట్టహాసంగా జరిగింది.కేంద్ర కార్మికశాఖ మంత్రి బండారు దత్తాత్రేయ రన్‌ ప్రారంభించారు. ఎల్బీస్టేడియం నుంచి ఎన్టీఆర్‌ గార్డెన్‌ వరకు రన్‌ కొనసాగింది. పలువురు జవాన్లతో పాటు క్రీడాకారులు, భాజపా ఎమ్మెల్యేలు కిషన్‌రెడ్డి, చింతల రామచంద్రారెడ్డి తదితరులు పాల్గొన్నారు.

వరంగల్ : జనగామను జిల్లాగా ప్రకటించాలని డిమాండ్ చేస్తూ జిల్లా సాధన సమితి ఆధ్వర్యంలో శనివారం బంద్ పాటిస్తున్నారు. సినిమా హాల్స్, పెట్రోల్ బంక్‌లు, విద్య, వ్యాపార సంస్థలు మూసివేశారు.

కరీంనగర్: సిరిసిల్లను జిల్లాగా ప్రకటించాలంటూ శనివారం అఖిలపక్షం ఆందోళన ఉద్రిక్తతకు దారి తీసింది. కేసీఆర్, కేటీఆర్ భారీ కటౌట్‌లకు నిప్పంటించేందుకు యత్నించడం ఉద్రిక్తతకు దారి తీసింది. అంబేద్కర్ చౌక్ వద్ద కేటీఆర్ ఫ్లెక్సీపై ఆందోళనకారులు పేడ విసిరారు. ఆందోళనకారులను అదుపులోకి తీసుకున్న పోలీసులు వేములవాడ పోలీస్‌‌స్టేషన్‌కు తరలించారు.

మహబూబ్‌నగర్: కృష్ణా పుష్కరాల సందర్భంగా తెలుగురాష్ట్రాల ఉమ్మడి గవర్నర్ నరసింహన్ శనివారం ఉదయం సతీసమేతంగా అలంపూర్ సమీపంలోని గొందిమళ్ల ఘాట్‌లో పుణ్యస్నానం ఆచరించారు. ఇదే ఘాట్‌లో పుష్కరాల తొలిరోజున సిఎం కెసిఆర్ దంపతులు పుష్కర స్నానం చేశారు. పుణ్యస్నానం అనంతరం గవర్నర్ దంపతులు అలంపూర్‌లోని జోగులాంబ ఆలయాన్ని సందర్శించారు. ఆలయ ప్రాంగణంలో నిర్వహిస్తున్న శతచండీయాగంలో గవర్నర్ పాల్గొన్నారు.