రాయ్‌పూర్: గద్వా నుంచి రాయ్‌పూర్ వస్తున్న ఓ ప్రైవేటు బస్సు బుధవారం అర్ధరాత్రి వేళ దఢోరా ఘాట్‌రోడ్‌పై ఎదురుగా వస్తున్న బైక్‌ను తప్పించబోయి లోయలో పడిపోయింది. ఈ ఘటనలో 13 మంది మరణించగా 53 మంది గాయపడ్డారు. క్షతగాత్రులను ఆస్పత్రికి తరలించారు. బస్సు ప్రమాదంపై చత్తీస్‌గఢ్ సిఎం రమణ్ సింగ్ దిగ్భ్రాంతి వ్యక్తం చేశారు. క్షతగాత్రులకు మెరుగైన వైద్యసేవలు అందించాలని ఆయన అధికారులను ఆదేశించారు.

చెన్నై: ముందస్తు అనుమతి లేకుండా ఎన్నికల ప్రచారం చేసినందుకు కాంగ్రెస్ అధికార ప్రతినిధి, సినీనటి కుష్బూ, ఆ పార్టీ అభ్యర్థి విజయతరణిపై తమిళనాడు ఎన్నికల అధికారులు కేసు నమోదు చేశారు. కన్యాకుమారి జిల్లా కుళిత్తురైలో బుధవారం నాడు విజయతరణికి మద్దతుగా ఓపెన్ టాప్ జీపులో ప్రయాణించి ఖుష్బూ ఎన్నికల ప్రచారం చేశారు.

న్యూఢిల్లీ, మే 4: దేశరాజధాని న్యూఢిల్లీలో ఉగ్రదాడుల కుట్రను పోలీసులు బుధవారం భగ్నం చేశారు. ఢిల్లీ, దాని పరిసర ప్రాంతాల్లో ఏకకాలంలో దాడులు నిర్వహించి 12మంది టెర్రరిస్టులను అరెస్టు చేశారు. జైష్ ఉగ్రవాదుల కదలికలకు సంబంధించి నిఘావర్గాలు అందించిన విశ్వసనీయ సమాచారం ప్రకారం ఢిల్లీ పోలీసు ప్రత్యేక సెల్‌కు చెందిన 12 ప్రత్యేక బృందాలు బుధవారం ఉదయం నుంచి ఒకేసారి మూకుమ్మడి దాడులు చేశాయి.

న్యూఢిల్లీ,మే 4: ప్రత్యేక హోదా ఇవ్వటం సాధ్యం కాదని చెప్పటం ద్వారా ఆంధ్రప్రదేశ్‌ను మోసం చేస్తున్నారని, ప్రత్యేక హోదా ఇవ్వకపోతే కాంగ్రెస్‌కు పట్టిన గతే బిజెపికి పడుతుందని తెలుగుదేశం సభ్యుడు గల్లా జయదేవ్ హెచ్చరించారు.