ముంబయి, ఫిబ్రవరి 29: ఈవారం స్టాక్ మార్కెట్లకు భారీ నష్టాలు తప్పలేదు. సోమవారం ట్రేడింగ్ మొదలైనప్పటి నుంచి చివరి రోజైన శుక్రవారం వరకూ మార్కెట్లు కోలుకోలేకపోయాయి. కరోనా వైరస్ ప్రభావం అన్ని రంగాల మాదిరిగానే స్టాక్ మార్కెట్లపైన కూడా తీవ్రంగా కనిపించింది. చైనా నుంచి ఈ వైరస్ ప్రపంచంలోని పలు దేశాలకు వ్యాప్తి చెందిన నేపథ్యంలో మదుపరులు ముందు జాగ్రత్త చర్యలు తీసుకున్నారు.

హైదరాబాద్: రాష్ట్రంలో విద్యుత్ చార్జీల పెంపు అంశంపై ప్రభుత్వం మల్లాగుల్లాలు పడుతోంది. మార్చి నుంచి విద్యుత్ చార్జీలు పెంచాలని ప్రభుత్వం అనుకున్నప్పటికీ ఈ వారం నుంచి అసెంబ్లీ సమావేశాలు జరగనున్న నేపథ్యంలో తాత్కాలికంగా విద్యుత్ చార్జీల పెంపు అంశం వాయిదా పడిందని ప్రభుత్వ వర్గాలు తెలిపాయి. మరోపక్క విద్యుత్ సంస్థలు తమ నివేదికను అందించడానికి కొంత గడువు కావాలని ఈఆర్‌కి లేఖ రాశాయి.

న్యూఢిల్లీ: భారత బులియన్ మార్కెట్లో బంగారం ధర గురువారం పెరిగింది. 10 గ్రాముల బంగారం 78 రూపాయలు పెరిగి, 43,513 రూపాయలకు చేరింది. కరోనా వైరస్ వ్యాప్తి కారణంగా స్టాక్ మార్కెట్లు కుదేలవుతున్న తరుణంలో, ఎక్కువ మంది మదుపరులు ముందు జాగ్రత్త చర్యగా బంగారం వైపు దృష్టి సారించడమే ఈ పెరుగులకు ప్రధాన కారణం. కిలో వెండి ధర 35 రూపాయలు పెరిగి, 48,130 రూపాయలకు చేరింది.

ఖమ్మం, ఫిబ్రవరి 27: తెలంగాణ రాష్ట్ర రోడ్డు రవాణా సంస్థ ద్వారా మార్చి 31లోగా కార్గో సేవలను ప్రారంభిస్తున్నట్లు రాష్ట్ర రవాణాశాఖా మంత్రి పువ్వాడ అజయ్‌కుమార్ తెలిపారు. ఖమ్మంలో గురువారం ఆయన విలేఖరులతో మాట్లాడుతూ దేశంలో ఎక్కడా లేని విధంగా ఆర్టీసీని అభివృద్ది బాటలోకి తీసుకువచ్చేందుకు కార్గో సేవలు ప్రారంభిస్తున్నామని, ఒకేసారి వంద కార్గో బస్సులను అందుబాటులోకి తీసుకురానున్నట్లు చెప్పారు.