విశాఖ: ఏడేళ్ల బాలిక అదృశ్యంపై ఆమె మేనమామను పోలీసులు అదుపులోకి తీసుకుని ప్రశ్నిస్తున్నారు. విశాఖ జిల్లా దేవరాపల్లిలో తన కుమార్తె కనిపించకుండా పోయిందని, ఆమెపై అత్యాచారం చేసి హత్య చేసి ఉంటారని తల్లి ధనలక్ష్మి బుధవారం పోలీసులకు ఫిర్యాదు చేసింది. మేనమామ గుణశేఖర్ ఈ దారుణానికి ఒడిగట్టాడని ఆమె ఫిర్యాదు చేయడంతో నిందితుడిని అరెస్టు చేసి బాలిక ఆచూకీ కోసం పోలీసులు గాలింపు చర్యలు చేపట్టారు.

కాకినాడ: వడ్డీ వ్యాపారుల వేధింపులు భరించలేక ఓ మహిళ ఒంటిపై కిరోసిన్ పోసుకొని ఆత్మహత్యకు యత్నించి, చికిత్స పొందుతూ ఆస్పత్రిలో మరణించింది. అల్లవరం మండలం బోధన్‌కుర్రుపాలెం లో బుధవారం లక్ష్మి అనే మహిళ ఆత్మహత్యకు పాల్పడటంతో వడ్డీ వ్యాపారులపై చర్యలు తీసుకోవాలని బంధువులు ఆందోళన ప్రారంభించారు.

హైదరాబాద్: ఎ.పి. అసెంబ్లీ స్పీకర్ కోడెల శివప్రసాదరావుపై వైకాపా ఎమ్మెల్యేలు అవిశ్వాస తీర్మానాన్ని సిద్ధం చేశారు. ఈ రోజు మధ్యాహ్నం వారు అసెంబ్లీకి చేరుకొని ఈ నోటీసును అందజేస్తారు. అవిశ్వాసం కోరుతూ 67 మంది ఎమ్మెల్యేలు సంతకాలు చేశారు.

నెల్లూరు: చిల్లకూరు మండలం కడివేడు వద్ద బుధవారం ఉదయం ఆటో బోల్తాపడి నలుగురు మరణించారు. మృతులలో ముగ్గురు మహిళలున్నారు. ఇదే సంఘటనలో గాయపడిన మరో ఇద్దరిని ఆస్పత్రికి తరలించారు.