హైదరాబాద్, సెప్టెంబర్ 24: ప్రముఖ స్వాతంత్య్ర సమరయోధుడు, తెలంగాణ రాష్ట్రంకోసం జీవితాంతం పాటుపడ్డ కొండాలక్ష్మణ్ బాపూజీ జయంతిని రాష్ట్ర కార్యక్రమం (స్టేట్ ఫంక్షన్) గా ప్రభుత్వం ప్రకటించింది. ఈ మేరకు శనివారం ఒక జీఓ జారీ చేశారు. ఈ నెల 27న బాపూజీ 101వ జయంతి జరుపుతున్నారు. ఇందుకోసం రాష్ట్ర మంత్రులు, ఉన్నతాధికారులతో ఉన్నతస్థాయి కమిటీని రాష్ట్ర ప్రభుత్వం నియమించింది.

నిజామాబాద్ : మద్నూర్ మండలంలో లెండివాగు ఉధృతికి ఎన్‌గురా, ఇలుగాం, కుర్ల, గోజేగాం, మదన్ ఇప్పర్గా గ్రామాలు శనివారం నీట మునిగాయి. భారీ వర్షాలకు వందల ఎకరాల్లో పంటపొలాలు నీటి మునిగాయి. రహదారులపై మోకాళ్ల లోతు నీరు చేరడంతో వాహనదారులు, ప్రజలు తీవ్ర ఇబ్బందులు పడ్డారు.

హైదరాబాద్‌: నగరంలోని లోతట్టు ప్రాంతాల్లో సహాయక చర్యలు చేపట్టేందుకు ఎన్డీఆర్‌ఎఫ్‌, ఆర్మీ బృందాలు శనివారం రంగంలోకి దిగాయి. భారీ వర్షాలతో అతలాకుతలమవుతున్న నిజాంపేట, హకీంపేట, ఆల్వాల్‌, బేగంపేట సహా పలు ప్రాంతాల్లో ఈ బృందాలు సహాయక చర్యల్లో పాల్గొన్నాయి.

హైదరాబాద్‌: వర్షాల నేపథ్యంలో వాటిల్లిన పంట నష్టంపై ప్రాథమిక అంచనాలు రూపొందించాలని తెలంగాణ ముఖ్యమంత్రి కేసీఆర్‌ అధికారుల్ని ఆదేశించారు. దిల్లీ పర్యటన ముగించుకొని శుక్రవారం రాత్రి హైదరాబాద్‌ నగరానికి వచ్చిన ముఖ్యమంత్రి శనివారం మంత్రులు తలసాని, నాయిని నర్సింహారెడ్డి, పద్మారావు, సీఎస్‌ రాజీవ్‌శర్మ, డీజీపీ అనురాగ్‌ శర్మ సహా పలువురు ఉన్నతాధికారులతో వరదల పరిస్థితిపై సమీక్ష సమావేశం ఏర్పాటు చేశారు.