విశాఖ: విశాఖలో జరుగుతున్న భాగస్వామ్య సదస్సు చివరిరోజున ఆయన పారిశ్రామికవేత్తలతో ఆంధ్రప్రదేశ్‌ ముఖ్యమంత్రి చంద్రబాబునాయుడు ముఖాముఖి నిర్వహించారు. ఈ సందర్భంగా మాట్లాడుతూ పర్యాటక రంగంలో వివిధ సంస్థలతో రూ.7,840 విలువైన 27 అవగాహన ఒప్పందాలు కుదుర్చుకున్నట్లు తెలిపారు. భాగస్వామ్య సదస్సులో పర్యాటక రంగంలో ఇవాళ రూ. 4,659 కోట్లతో 26 ఒప్పందాలు చేసుకున్నట్లు మంత్రి గంటా శ్రీనివాసరావు వెల్లడించారు.

నెల్లూరు: భార్య ప్రవర్తనపై అనుమానం పెంచుకున్న వెంకటేశ్వర్లు అనే వ్యక్తి ఆమె గొంతు కోసి పరారయ్యాడు. నగరంలోని పొదలకూరు రోడ్డులో మంగళవారం ఉదయం ఈ సంఘటన జరిగింది. గాయపడిన భార్య పుష్పలత (22)ను ప్రభుత్వ ఆస్పత్రిలో చేర్పించారు. ఆమె పరిస్థితి విషమంగా ఉంది.

విశాఖ: విశాఖ ఏజెన్సీలో దట్టమైన పొగ మంచు ఆవరించటంతో ప్రకృతి మరింత అందాలు సంతరించుకుంది. ఉదయం 10 గంటల వరకు పొగ కమ్మేయటంతో వాహనాల రాకపోకలకు ఇబ్బంది ఏర్పడింది. లంబసింగిలో 5, చింతపల్లిలో 8, పాడేరులో 9 కనిష్ఠ ఉష్ణోగ్రత నమోదైంది. ప్రకృతి అందాలను చూసేందుకు పలు ప్రాంతాల నుంచి పర్యాటకులు తరలి వస్తున్నారు.

హైదరాబాద్: సంక్రాంతి సందర్భంగా ప్రయాణీకుల రద్దీని తట్టుకునేందుకు ఎ.పి.ఎస్. ఆర్టీసీ 2600 ప్రత్యేక బస్సులను నడుపుతుందని రవాణా శాఖ మంత్రి సిద్ద రాఘవరావు చెప్పారు. రద్దీ దృష్ట్యా అధిక చార్జీలు వసూలు చేసే ప్రైవేటు ట్రావెల్స్‌పై కఠిన చర్యలు తీసుకోవాలని ఆయన అధికారులను ఆదేశించారు. ఒక్క హైదరాబాద్ నుంచే రోజుకు 600 ప్రత్యేక బస్సులు నడుపుతామన్నారు.