విజయవాడ: భారీ వర్షాల కారణంగా జనజీవనం అస్తవ్యస్తం కాకుండా ఎప్పటికప్పుడు చర్యలు తీసుకోవాలని ఎపి సిఎం చంద్రబాబు అధికారులను ఆదేశించారు. వాయుగుండం ప్రభావంతో విస్తారంగా వర్షాలు కురుస్తున్న నెల్లూరు, చిత్తూరు, ప్రకాశం, విశాఖ, తూర్పు గోదావరి, గుంటూరు జిల్లాల కలెక్టర్లతో ఆయన బుధవారం సమీక్ష నిర్వహించారు. ముంపు ప్రాంతాల్లో ప్రజలను ముందుగానే సురక్షిత ప్రాంతాలకు తరలించి, కనీస సౌకర్యాలు కల్పించాలన్నారు.

తిరుమల: విద్యుత్ షార్ట్ సర్క్యూట్ కారణంగా బుధవారం ఉదయం కేబుల్స్ అంటుకుని శ్రీవారి ఆలయం సమీపంలో మంటలు చెలరేగాయి. అగ్నిమాపక సిబ్బంది మంటలు ఆర్పివేశారు. వర్షం కురుస్తుండగా మరోవైపు దట్టమైన పొగ కమ్మేయడంతో భక్తులు భయబ్రాంతులకు గురయ్యారు.

కర్నూలు: తెలంగాణలో ఇరిగేషన్ ప్రాజెక్టుల గురించి ఆ రాష్ట్ర మంత్రి హరీష్‌రావు అన్నీ అబద్ధాలే చెబుతున్నారని డిప్యూటీ సిఎం కెఇ కృష్ణమూర్తి బుధవారం ఇక్కడ అన్నారు. తెలంగాణలో చేపట్టే అక్రమ ప్రాజెక్టులను అడ్డుకుంటామన్నారు. వైకాపా అధినేత జగన్ చేస్తున్న దీక్షలను ఎవరూ పట్టించుకోనవసరం లేదన్నారు.

తిరుపతి: వేసవి సెలవుల కారణంగా తిరుమలకు భారీ సంఖ్యలో భక్తులు తరలివస్తుండగా బుధవారం ఉదయం ఎడతెరిపి లేని రీతిలో వర్షం కురుస్తోంది. ఉదయం 11 గంటల సమయానికే పది సెంటీమీటర్ల వర్షపాతం నమోదైంది. ఒకటి, రెండు రోజులు ఇలాగే వర్షం కురిసే అవకాశం ఉందంటున్నారు. భారీ వర్షంతో ఆలయ పరిసరాల్లో నీరు చేరడంతో భక్తులు నానాపాట్లు పడుతున్నారు. మోటార్లను వినియోగించి వరద నీటిని బయటకు పంపుతున్నారు.