గుంటూరు, మే 17: రాజధాని అమరావతి నగరంలో జోన్లకు సీఆర్డీయే కసరత్తు జరుపుతోంది. సింగపూర్ మాస్టర్‌ప్లాన్ ప్రకారం నివాసాలు, వాణిజ్య, వ్యాపార భవనాల నిర్మాణానికి సంబంధించి ఇప్పటికే నిర్దిష్టమైన అనుమతులు తప్పనిసరి చేశారు. ఈనెల 20వ తేదీతో రైతుల ప్లాట్ల పంపిణీ ప్రక్రియపై అభ్యంతరాల గడువు పూర్తవుతుంది. నెలాఖరులోగా భూ సమీకరణలో భూములిచ్చిన రైతులకు ప్లాట్ల కేటాయింపు ప్రారంభించాలని సీఆర్డియే భావిస్తోంది.

కర్నూలు, మే 17 : కృష్ణా నదిపై తెలంగాణ ప్రభుత్వం నిర్మిస్తున్న ప్రాజెక్టులు ముమ్మాటికీ అక్రమ ప్రాజెక్టులేనని ఏపి ఉప ముఖ్యమంత్రి కెఇ కృష్ణమూర్తి స్పష్టం చేశారు. మంగళవారం కర్నూలులో విలేఖరుల సమావేశంలో మాట్లాడారు. తెలంగాణ ప్రాజెక్టులు అక్రమమైనవని తేల్చేందుకు తమ వద్ద కీలక ఆధారాలు ఉన్నాయని, అవసరమైన సమయంలో వాటిని కోర్టు ముందు ఉంచుతామని తెలిపారు.

విజయవాడ, మే 17: గడచిన రెండేళ్లుగా ఉపాధ్యాయ పోస్టుల భర్తీ కోసం ఎదురుచూస్తున్న డిఎస్సీ 2014 అభ్యర్థుల కలలు ఎట్టకేలకు నెరవేరబోతున్నాయి. సుమారు 10,300 ఉపాధ్యాయుల పోస్టుల భర్తీ కోసం జరిగిన డిఎస్సీ పరీక్షలకు సంబంధించిన ఫలితాలు 2015 జూన్ 2వ తేదీ విడుదలయ్యాయి. కోర్టు వివాదాలతో నియామకాల ప్రక్రియ ఎప్పటికప్పుడు వాయిదా పడుతూ వచ్చింది. దీనిపై అభ్యర్థులు రెండేళ్లుగా ఆందోళన చేస్తూ వచ్చారు.

విజయవాడ: ఎపి ప్రజలకు మేలు చేయాలన్న చిత్తశుద్ధి ఉంటే వైకాపా అధినేత జగన్ దిల్లీ వెళ్లి దీక్షలు చేయాలని ఎపి మంత్రి పత్తిపాటి పుల్లారావు సలహా ఇచ్చారు. రాజకీయంగా ఉనికిని చాటుకోవడానికి జగన్ చేస్తున్న దీక్షలను జనం నమ్మే పరిస్థితి లేదన్నారు. కృష్ణా, గోదావరి నదులపై ఎగువ రాష్ట్రాల్లో కడుతున్న ప్రాజెక్టులపై ముఖ్యమంత్రి చంద్రబాబు ఎప్పటికప్పుడు కేంద్రంతో సంప్రదిస్తున్నారని ఆయన తెలిపారు.