ముంబయి: వివాదాస్పద ఆధ్యాత్మిక గురువుగా తరచూ వార్తల్లో నిలిచే రాధేమాపై ముంబయి పోలీసులు ఆయుధాల చట్టం కింద కేసు నమోదు చేశారు. వరకట్నం వేధింపులు, అసభ్య నృత్యాలకు సంబంధించి ఆమెపై గతంలో కేసులు పెట్టారు. గత ఏడాది ఔరంగాబాద్ నుంచి ముంబయికి విమానంలో ప్రయాణించినపుడు ఆమె త్రిశూలం పట్టుకుని ప్రయాణించారన్న ఫిర్యాదులపై ఇపుడు ముంబయి ఎయిర్ పోర్టు పోలీసులు ఎఫ్‌ఐఆర్ నమోదు చేశారు.

దిల్లీ: వివిధ బ్యాంకులకు తాను బకాయిపడిన నాలుగువేల కోట్ల రూపాయలను సెప్టెంబర్‌లోగా చెల్లిస్తానని, ఈ మేరకు తనకు గడువు ఇవ్వాలని వ్యాపారవేత్త విజయ్ మాల్యా సుప్రీం కోర్టును కోరారు. లండన్‌లో ఉంటున్న ఆయనను వీడియో కాన్ఫరెన్స్ ద్వారా కోర్టు బుధవారం విచారించింది. మాల్యా చేసిన ఈ ప్రతిపాదనపై వారంలోగా స్పందించాలని బ్యాంకుల కన్సార్టియంను ఆదేశిస్తూ కేసు విచారణను ఏప్రిల్ 7కు సుప్రీం వాయిదా వేసింది.

న్యూఢిల్లీ, మార్చి 29: కేంద్ర ప్రభుత్వం మంగళవారం రాత్రి పార్లమెంట్ బడ్జెట్ సమావేశాలను ప్రోరోగ్ చేసి సంచలనం సృష్టించింది. రాజకీయ సంక్షో భం కారణంగా ప్రస్తుతం రాష్టప్రతి పాలనలో ఉన్న ఉత్తరాఖండ్ ఏప్రిల్ 1వ తేదీ తర్వాత ఖర్చుల కోసం నిధులను సమకూర్చేలా ఆర్డినెన్సు జారీకి వీలుకల్పించుకునేందుకు కేంద్ర ప్రభుత్వం ఈ చర్య చేపట్టింది.

న్యూఢిల్లీ,మార్చ్ 29: ఆంధ్రప్రదేశ్ విభజన చట్టాన్ని సవరించి తెలుగు రాష్ట్రాల శాసనసభల్లో సీట్ల సంఖ్య పెంపునకు ఉద్ధేశించిన బిల్లును రెండో విడత బడ్జెట్ సమావేశాల సందర్భంగా పార్లమెంట్‌లో ప్రవేశపెట్టాలని తెలంగాణ రాష్ట్ర పంచాయతీ, ఐటి శాఖల మంత్రి కె.తారక రామారావు డిమాండ్ చేశారు. మంగళవారం ఆయన కేంద్ర హోం శాఖ మంత్రి రాజ్‌నాథ్ సింగ్‌ను కలిసి ఈ డిమాండ్ చేశారు.