న్యూఢిల్లీ, ఏప్రిల్ 5: ప్రధాన మంత్రి నరేంద్ర మోదీ మేక్ ఇన్ ఇండియా కార్యక్రమం ద్వారా దేశానికి అంతర్జాతీయ గుర్తింపు తీసుకురావటంతోపాటు దేశ ఆర్థిక వ్యవస్థను బలోపేతం చేశారని కేంద్ర కార్మిక శాఖ మంత్రి బండారు దత్తాత్రేయ తెలిపారు. మేక్ ఇన్ ఇండియా, స్కిల్ ఇండియా మూలంగా దేశంలోని లక్షలాది మంది కార్మికుల జీవితాల్లో వెలుగు నిండుతోందని ఆయన ప్రశంసించారు.

నల్బరి (అస్సాం), ఏప్రిల్ 5: ప్రధాని నరేంద్ర మోదీ తన రెండేళ్ల పాలనలో ఏం చేశారో చెప్పాలని ఎఐసిసి అధినేత్రి సోనియా గాంధీ ప్రశ్నించడాన్ని బిజెపి జాతీయ అధ్యక్షుడు అమిత్ షా ఎదురుదాడికి దిగారు. ఇక్కడ జరిగేది లోక్‌సభ ఎన్నికలు కావనీ, అస్సాం అసెంబ్లీకి జరుగుతున్న ఎన్నికలని ఆయన ఎద్దేవా చేశారు. అసెంబ్లీ ఎన్నికల ప్రచారానికి వచ్చి, మోదీ ఏం చేశారో చెప్పాలనడంలో అర్థం లేదని అమిత్ షా పేర్కొన్నారు.

న్యూఢిల్లీ, ఏప్రిల్ 5: కృష్ణా నదీజలాల వివాదం పరిష్కరించే బ్రిజేష్ కుమార్ ట్రిబ్యునల్ విచారణ బుధవారానికి వాయిదా పడింది. హైకోర్టు సిట్టింగ్ జడ్జి జస్టిస్ రామ్మోహన్‌రెడ్డిని ట్రిబ్యునల్ సభ్యుడిగా నియమించడంపై కర్నాటక అభ్యంతరం తెలిపింది. ఆయన స్థానంలో మరొకరిని నియమించాలని కర్నాటక ప్రభుత్వం తరుఫున న్యాయవాది అనిల్ దివాన్ ట్రిబ్యునల్ దృష్టికి తీసుకెళ్లారు.

న్యూఢిల్లీ, ఏపి ల్ 5: ‘పనామా’ బాగోతం భారతీయ బడాబాబులకు గుబులు పుట్టిస్తోంది. ఒక్కో డాక్యుమెంట్ ఒక్కొక్కరి ‘నల్ల’వ్యాపార జీవితాలను బయట పెడుతుండటంతో తాము తప్పులు చేయలేదని చెప్పుకోవటానికి ఒక్కొక్కరు రకరకాల రూపాల్లో మీడియా ముందు క్యూలు కడుతున్నారు. తామేమీ తప్పు చేయలేదని.. తమంత మంచివాళ్లమని కలర్ ఇచ్చుకునే ప్రయత్నం చేస్తున్నారు.