శ్రీనగర్‌: శ్రీనగర్‌లో గురువారం ఎయిర్‌ ఇండియా ల్యాండ్‌ అవుతుండగా రెండు టైర్లు పేలాయి. విమానం సురక్షితంగా ల్యాండ్‌ అవ్వడంతో పెను ప్రమాదం తప్పింది. విమానంలో సెంట్రల్‌ పారామిలిటరీ సిబ్బంది ఉన్నారు. ప్రమాదంలో ఎవ్వరూ గాయపడలేదని విమానాశ్రయ పోలీసు అధికారి వెల్లడించారు.

లక్నో: బీఎస్పీ అధినేత్రి మాయావతికి ఉత్తరప్రదేశ్ అసెంబ్లీ ఎన్నికల తరుణంలో ఎదురుదెబ్బలు తగులున్నాయి. పార్టీ శాసనసభాపక్ష నేత స్వామి ప్రసాద్ మౌర్య పార్టీకి గుడ్ బై చెప్పి 10 రోజులు గడవకముందే మాజీ మంత్రి ఆర్కే చౌదరి పార్టీని వీడుతున్నట్టు ప్రకటించారు. ఎన్నికలకు ముందు సీనియర్ నాయకులు పార్టీని వీడుతుండడం పట్ల బీఎస్పీలో కలవరం రేపుతోంది. మాయావతి టిక్కెట్లు అమ్ముకుంటున్నారని నాయకులు ఆరోపించారు.

శ్రీనగర్: పుల్వామా జిల్లాలో భద్రత దళాలకు, వేర్పాటువాద గెరిల్లాలకు మధ్య గురువారం జరిగిన ఎన్కౌంటర్లో ఇద్దరు వేర్పాటువాదులను భద్రత సిబ్బంది మట్టుబెట్టారు. మల్లార గ్రామంలో గెరిల్లాలు దాగి ఉన్నట్లు భద్రత సిబ్బందికి సమాచారం అందింది. దీంతో భద్రత సిబ్బంది స్థానికంగా తనిఖీలు నిర్వహించారు. ఆ విషయాన్ని గమనించిన గెరిల్లాలు ఎదురుకాల్పులకు దిగారు. దీంతో ఎన్కౌంటర్ చోటు చేసుకుంది.

న్యూఢిల్లీ, జూన్ 29: అటవీ, పర్యావరణ అనుమతుల్లో ఇంకెంత మాత్రం జాప్యం జరగడానికి వీల్లేదని, వంద రోజుల్లోనే వాటిని ఆమోదించాలని కేంద్ర పర్యావరణ మంత్రి ప్రకాశ్ జవడేకర్ స్పష్టం చేశారు. ఇందుకు సంబంధించిన ప్రక్రియను వంద రోజుల్లోనే పూర్తి చేసే విధంగా రాష్ట్ర విభాగాలు పని చేయాలని పిలుపునిచ్చారు.