రేణిగుంట, సెప్టెంబర్ 18: స్పైస్ జెట్ విమానం ప్రమాదానికి గురైన సంఘటనతో విమానాల రాకపోకలకు అంతరాయం ఏర్పడింది. ఈనేపథ్యంలో రేణిగుంట విమానాశ్రయానికి రావాల్సిన విమానాలు ఆదివారం కూడా రద్దయ్యాయి. శనివారం రాత్రి స్పైస్ జెట్ విమానం ల్యాండింగ్ అయి యు టర్న్ తీసుకునే సమయంలో రన్ వే నుంచి సుమారు 120 మీటర్లు మట్టిలోకి వెళ్లడంతో విమానం టైర్లు బురదలో కూరుకుపోయాయి.

న్యూఢిల్లీ, సెప్టెంబర్ 18: కాశ్మీర్‌లోని యూరి సెక్టార్‌లోని సైనిక స్థావరంపై జరిగిన ఉగ్రవాద దాడిని ప్రధాని నరేంద్ర మోదీ తీవ్ర పదజాలంతో ఖండించారు. ఈ గర్హనీయ, పిరికిపందల చర్యకు పాల్పడిన వారిని వదిలి పెట్టేది లేదని తీవ్ర స్వరంతో హెచ్చరించారు. ఉగ్రవాద దాడిలో మరణించిన సైనికుల్ని దేశం కోసం ప్రాణాలర్పించిన త్యాగ ధనులుగా అభివర్ణించి వారికి అభివాదం చేశారు.

న్యూఢిల్లీ, సెప్టెంబర్ 18: యూనియన్ పబ్లిక్ సర్వీస్ కమిషన్ (యుపిఎస్‌సి)చైర్మన్‌గా మాజీ ఐఎఎస్ అధికారి అల్కా సిరోహి నియమితమయ్యారు. మంగళవారం పదవీ విరమణ చేస్తున్న దీపక్ గుప్తా స్థానే సిరోహీ నియమితమయ్యారు. 21న ఆమె పదవీ బాధ్యతలు చేపడతారు. ప్రస్తుతం యుపిఎస్‌సి కమిషన్ సభ్యురాలిగా సిరోహీ కొనసాగుతున్నారు. ఈ తాజా నియామకం వచ్చే ఏడాది జనవరి మూడో తేదీ వరకూ లేదా తదుపరి ఉత్తర్వులు జారీ అయ్యే వరకూ కొనసాగుతుంది.

న్యూఢిల్లి:ఉగ్రవాదుల దాడిలో మరణించిన వీరజవాన్లకు రాష్టప్రతి ప్రణబ్ ముఖర్జీ నివాళి అర్పించారు. వారి కుటుంబ సభ్యులకు సంతాపం ప్రకటించారు. ఉగ్రవాదుల దాడులకు భారత్ బెదిరిపోదని పేర్కొన్నారు. తీవ్రవాదాన్ని పెంచిపోషిస్తున్నవారికి తగిన విధంగా బుద్ధి చెప్పాలని అభిప్రాయపడ్డారు.