విజయవాడ: కొంతమంది ఆడిస్తున్న నాటకంలో కాపు నాయకుడు ముద్రగడ పద్మనాభం కీలుబొమ్మలా మారారని మంత్రి గంటా శ్రీనివాసరావు అన్నారు. వైఎస్ రాజశేఖరరెడ్డి హయంలో కాపులకు రిజర్వేషన్ల గురించి ముద్రగడ ఎందుకు ప్రశ్నించలేదన్నారు. కాపుగర్జన సందర్భంగా తునిలో విధ్వంసకాండకు వైకాపా ప్రోత్సాహం ఉందన్నారు. ఉద్యమాల పేరిట కాపులకు ముద్రగడ అన్యాయం చేస్తున్నారన్నారు.

హైదరాబాద్: ఆంధ్రప్రదేశ్ నుంచి రాజ్యసభ సీటు కోసం మిత్రపక్షమైన బిజెపి నుంచి ఎలాంటి ప్రతిపాదన రాలేదని టిడిపి యువనేత నారా లోకేష్ బుధవారం తెలిపారు. ఎపిలో ఖాళీ అవుతున్న రాజ్యసభ సీట్లను తెలంగాణ ప్రాంత నేతలకు ఇచ్చే అవకాశం లేదన్నారు. రాజ్యసభ సీట్లకు ఎంపిక గురించి పార్టీ పాలిట్‌బ్యూరో సమావేశం నిర్ణయిస్తుందన్నారు.

హైదరాబాద్: ఎపికి ప్రత్యేక హోదా ఇవ్వాలంటూ కేంద్రాన్ని కోరుతూ టిడిపి మహానాడులో తీర్మానం చేయాలని కాంగ్రెస్ నేత కెవిపి రామచంద్రరావు సిఎం చంద్రబాబుకు లేఖ రాశారు. బిజెపితో పొత్తుకంటే ప్రత్యేక హోదా కోసం ప్రాధాన్యత ఇవ్వాలని ఆయన కోరారు. హోదా వల్ల ప్రయోజనం ఉండదని చంద్రబాబు మాట్లాడడం సరికాదన్నారు.

అనంతపురం: పట్టణంలోని ఓ వస్త్ర దుకాణంలో నకిలీ వెయ్యి రూపాయలను మార్చేందుకు ప్రయత్నించిన ఇద్దరిని పోలీసులు బుధవారం అరెస్టు చేశారు. బిహార్‌కు చెందిన షేక్ ముజాహిల్ అలీ, జార్ఖండ్‌కు చెందిన అన్వర్ షేక్ దుస్తులను కొనుగోలు చేసిన ఇచ్చిన వెయ్యి రూపాయల నోట్లు నకిలీవని దుకాణం యజమాని గుర్తించి పోలీసులకు సమాచారం అందించారు. నిందితులిద్దరూ అంతర్రాష్ట్ర ముఠాలో సభ్యులని పోలీసులు తెలిపారు.