కాకినాడ: కాపుగర్జన సందర్భంగా గత ఆదివారం తుని వద్ద జరిగిన హింసాకాండకు సంబంధించి తుని రూరల్ పోలీసు స్టేషన్‌లో 57, అర్బన్ పోలీసు స్టేషన్‌లో 7, రైల్వే పోలీసులు 3 కేసులు నమోదు చేశారు. పలు సెక్షన్ల కింద నమోదైన కేసుల్లో ఎ1 (మొదటి నిందితుడు)గా మాజీ మంత్రి పద్మనాభం పేరును నమోదు చేశారు.

విజయవాడ: అమరావతి ప్రాంతంలో తాత్కాలిక రాజధాని నిర్మాణానికి సిఆర్‌డిఏ అధికారులు ఈ రోజు టెండర్లు తెరవనున్నారు. టెండర్ దాఖలు చేసేందుకు మూడు రోజుల గడువు పెట్టారు. తొలి దశలో జి+ వన్ నిర్మాణాలను పూర్తి చేస్తారు. జూన్‌లోగా ఎ.పి. ఉద్యోగులందరినీ హైదరాబాద్ నుంచి తాత్కాలిక రాజధానికి రప్పించాలని ప్రభుత్వం నిర్ణయించింది.

విశాఖ: పాడేరు ఘాట్ రోడ్డులో బుధవారం ఉదయం ఓ కారు అదుపుతప్పి లోయలోకి పడిపోయింది. ఈ ఘటనలో ఒకరు మృతి చెందగా, ఇద్దరు మహిళలు గాయపడ్డారు. నిద్రమత్తులో డ్రైవర్ కారు నడపడం వల్లే ఈ ప్రమాదం జరిగిందని క్షతగాత్రులు చెబుతున్నారు.

నెల్లూరు: మర్రిపాడు వద్ద అటవీ శాఖ అధికారులు బుధవారం ఉదయం ఆకస్మిక తనిఖీలు నిర్వహించి ఆరుగురు స్మగ్లర్లను అరెస్టు చేసి, 50 ఎర్రచందనం దుంగలను, ఆటోను స్వాధీనం చేసుకున్నారు. పరారీలో ఉన్న 24 మంది కోసం గాలిస్తున్నారు. అటవీ ఉద్యోగికి చెందిన బైక్‌పై ముగ్గురు స్మగ్లర్లు పరారయ్యారు.