విశాఖ: కేంద్ర హోం మంత్రి రాజ్‌నాథ్ సింగ్ గురువారం సాయంత్రం ఇక్కడి కలెక్టర్ కార్యాలయంలో పోలీసు శాఖ అధికారులతో సమావేశమయ్యారు. విశాఖ ఏజెన్సీలో మావోయిస్టుల కార్యకలాపాలు, శాంతి భద్రతలు, వర్సిటీల్లో విద్యార్థి సంఘాల ఆందోళనలు వంటి అంశాలను ఆయన ప్రస్తావించినట్లు తెలిసింది. ఎపి హోం మంత్రి చినరాజప్ప, ప్రభుత్వ ప్రధాన కార్యదర్శి టక్కర్, డిజిపి జెవి రాముడు, ఇతర అధికారులు పాల్గొన్నారు.

గుంటూరు: చిలకలూరిపేట ప్రాంతంలో పలు అభివృద్ధి పనులకు ఎపి సిఎం చంద్రబాబు గురువారం శంకుస్థాపనలు చేశారు. సుమారు 420 కోట్ల రూపాయల వ్యయంతో ప్రజలకు కనీస అవసరాలు తీరేలా పనులు చేపడతామని ఆయన ప్రకటించారు. కేంద్ర మంత్రి వెంకయ్య నాయుడు తదితరులు హాజరయ్యారు.

కాకినాడ: తూర్పు గోదావరి జిల్లా పెద్దాపురంలోని ఓ కల్యాణ మండపంలో బుధవారం అర్ధరాత్రి ఓ మహిళకు చెందిన 4 లక్షల రూపాయల విలువ చేసే బంగారు నగలను దొంగలు చోరీ చేశారు. రాజమండ్రి నుంచి పెళ్లికి వచ్చిన లక్ష్మి అనే మహిళ విడిది గదిలో నిద్రించగా, ఆమె బ్యాగులో ఉన్న నగలు మాయమయ్యాయి. గురువారం ఉదయం బ్యాగును తెరిచి నగలు కనిపించకపోవడంతో ఆమె స్థానిక పోలీసులకు ఫిర్యాదు చేశారు.

విజయవాడ: ఎ.పి.ఎస్. ఆర్టీసీ గుర్తింపు సంఘం ఎన్నికల సందర్భంగా రాష్ట్రంలోని 126 డిపోల్లో గురువారం ఉదయం 5 గంటలకు పోలింగ్ ప్రారంభమైంది. ఎన్‌ఎంయు, ఎంప్లారుూస్ యూనియన్ మధ్య ప్రధాన పోటీ జరుగుతోంది. కొన్నిచోట్ల తెలుగుదేశం పార్టీ అనుబంధ సంస్థ కార్మిక పరిషత్ కూడా రంగంలో నిలిచింది. 56వేల మంది కార్మికులు తమ ఓటుహక్కును వినియోగించుకో నున్న దృష్ట్యా పోలింగ్ కేంద్రాల్లో భారీ బందోబస్తు ఏర్పాటు చేశారు.