హైదరాబాద్‌: ఆంధ్రప్రదేశ్‌ ముఖ్యమంత్రి చంద్రబాబు నాయుడు సోమవారం ఉదయం తెలుగు రాష్ట్రాల ఉమ్మడి గవర్నర్‌ నరసింహన్‌తో రాజ్‌భవన్‌లో కలుసుకున్నారు. శాసనసభ సమావేశాలు జరిగిన తీరు, రాష్ట్రానికి కేంద్రం ప్రకటించిన ప్యాకేజీ, పలు అంశాలపై గవర్నర్‌తో చంద్రబాబు చర్చించనున్నట్లు సమాచారం.

కూచిపూడి, సెప్టెంబర్ 11: నాట్యక్షేత్రం కూచిపూడిలోని శ్రీ సిద్ధేంద్ర యోగి కూచిపూడి కళాపీఠాన్ని పొట్టి శ్రీరాములు తెలుగు విశ్వవిద్యాలయం పరిపాలనా కేంద్రంగా రూపుదిద్దేందుకు ప్రభుత్వం యోచిస్తోందని విశ్వసనీయ వర్గాల ద్వారా తెలిసింది. కూచిపూడి అమరావతి పరిధిలో ఉండటం ఇందుకు కారణంగా పేర్కొంటున్నారు. విశ్వవిద్యాలయాన్ని మాత్రం రాజమండ్రి నన్నయ్య పీఠంలోకి మార్పుచేసేందుకు ప్రభుత్వం యోచిస్తోంది.

విశాఖపట్నం, సెప్టెంబర్ 11: భారతీయ జనతాపార్టీ రాష్ట్ర అధ్యక్షుడు, విశాఖ ఎంపి కంభంపాటి హరిబాబుకు చేదు అనుభవం ఎదురైంది. ఢిల్లీ నుంచి ఆదివారం విశాఖ వచ్చిన ఆయనను విశాఖ విమానాశ్రయంలో అఖిలపక్ష నాయకులు ఘెరావ్ చేశారు. రాష్ట్రానికి హోదా స్థానే ప్యాకేజీ ప్రకటన, విశాఖ కేంద్రంగా రైల్వేజోన్ ఏర్పాటుపై కొనసాగుతున్న సందిగ్ధతపై బిజెపి ఎంపిని అఖిలపక్షం నాయకులు అడ్డుకుని ఘెరావ్ చేశారు.

హైదరాబాద్, సెప్టెంబర్ 11: ఆంధ్ర, తెలంగాణ మధ్య జలవివాదాల పరిష్కారానికి ఇద్దరు ముఖ్యమంత్రుల సమావేశం తేదీలపై సందిగ్ధత నెలకొంది. సుప్రీంకోర్టు ఆదేశం మేరకు కేంద్ర జలవనరుల శాఖ ఈ నెల 18 లేదా 19 తేదీల్లో అత్యున్నత సమావేశం నిర్వహించాలని నిర్ణయించింది. పై తేదీల్లో ఒక రోజు ఖరారు చేయాలని సూచించారు. 19న సమావేశానికి సిద్ధంగా ఉన్నట్లు చంద్రబాబు కేంద్రానికి సమాచారం ఇచ్చారు.