విశాఖ: 2,200 కోట్ల రూపాయలతో విశాఖ పోర్టును ఆధునీకరిస్తున్నట్లు పోర్టు చైర్మన్ ఎంటి కృష్ణబాబు బుధవారం తెలిపారు. పోర్టు సామర్థ్యం 90 మిలియన్ టన్నుల నుంచి 125 మిలియన్ టన్నులకు పెరిగేలా ఆధునీకరణ పనులు జరుగుతాయన్నారు. పోర్టులో పది కోట్లతో ఏసీ టెర్మినల్, భీమిలి వద్ద 300 కోట్లతో క్రూయిజ్ టెర్నినల్ నిర్మాణానికి ప్రతిపాదనలు ఉన్నాయన్నారు.

హైదరాబాద్: ఎమ్మెల్యేలు, ఎమ్మెల్సీల జీతభత్యాలను పెంచేందుకు ఉద్దేశించిన బిల్లును బుధవారం ఎపి శాసనసభ ఆమోదించింది. ఈ పెంపును వైకాపా సభ్యులు వ్యతిరేకించడంతో సభలో కొంతసేపు వాగ్వాదం జరిగింది. ఎమ్మెల్యేల జీతభత్యాల పెంపు విషయమై ఏదోఒక నియోజకవర్గంలో ప్రజాభిప్రాయం కోరితే ఏ ఒక్కరూ దీన్ని సమర్థించరని వైకాపా సభ్యుడు కోటంరెడ్డి అన్నారు.

విజయవాడ: మానవతా విలువలతో వైద్యులు రోగులకు సేవలందించాలని, వ్యాపార ధోరణిని విడనాడాలని గవర్నర్ నరసింహన్ పిలుపునిచ్చారు. ఇక్కడ బుధవారం జరిగిన ఎన్టీఆర్ హెల్త్ వర్సిటీ స్నాతకోత్సవంలో ఆయన మాట్లాడుతూ, రోగులకు సేవలందించే ముందు ‘ఇన్స్యూరెన్స్ ఉందా?’ అని అడగడం మానేసి వైద్యులు నిజాయితీగా సేవలందించాలన్నారు. గ్రామీణ ప్రాంతాల్లో సేవలందించేందుకు యువ వైద్యులు కృషిచేయాలన్నారు.

హైదరాబాద్: పాతబడ్డ బస్సుల స్థానంలో కొత్తగా 3వేల బస్సులను అందుబాటులోకి తేవాలంటూ ఎపి సిఎం చంద్రబాబు ఆదేశించారు. బుధవారం ఎపిఎస్ ఆర్టీసీ ఎండి సాంబశివరావు ఇక్కడ ముఖ్యమంత్రిని కలిశారు. ప్రయాణీకులకు మెరుగైన సౌకర్యాలు కల్పించాలని, ఆక్యుపెన్సీ రేషియోను పెంచాలని సిఎం సూచించారు. మారుమూల ప్రాంతాల్లోని బస్ స్టేషన్లను కూడా ఆధునీకరించాలని ఆయన ఆదేశించారు.