త్వరలో రానున్న ఓ స్ర్తి

ఆశీష్ గాంధి, వంశీకృష్ణ, కునాల్ కౌశిక్, దీక్షాపంత్, శృతిమోల్, మనాలి రాధోడ్ ప్రధాన తారాగణంగా రీడింగ్ లాంప్ క్రియేషన్స్ పతాకంపై అశోక్‌రెడ్డి స్వీయ దర్శకత్వంలో రూపొందించిన చిత్రం ‘ఓ స్ర్తి రేపురా’ (కల్పితామా.. ఖచ్చితమా). ఈ చిత్రాన్ని అన్ని కార్యక్రమాల్ని పూర్తిచేసి ఈనెలలోనే విడుదల చేయడానికి సన్నాహాలు చేస్తున్నారు. ఈ సందర్భంగా దర్శక నిర్మాత అశోక్‌రెడ్డి మాట్లాడుతూ- గతంలో ప్రతి ఊరిలో ఓ దెయ్యం తిరుగుతుందని, తమ ఇంటికి ఆ దెయ్యం రావద్దని గోడలపైన, తలుపులపైన రాసేవారని, చాలామంది అప్పట్లో భయంతో గ్రామాలను విడిచిపెట్టిన సందర్భాలు కూడా వున్నాయని, అటువంటి కథనాన్ని తీసుకుని ఈ చిత్రాన్ని హారర్ థ్రిల్లర్‌గా చిత్రీకరించామని తెలిపారు. వైవిధ్యంగా వుండడంకోసం కథను సినిమాటిక్‌గా చేసి ఈ సినిమాను అందరికీ నచ్చేలా రూపొందించామని, ఇటీవల విడుదలైన ఆడియోకు మంచి స్పందన వస్తోందని ఆయన అన్నారు. రీరికార్డింగ్ హైలెట్‌గా నిలిచే ఈ చిత్రాన్ని ఈనెల మూడవ వారంలో విడుదల చేయడానికి సన్నాహాలు చేస్తున్నామన్నారు. (చిత్రం) ఆశీష్ గాంధి, మనాలి రాధోడ్