అనాథ పిల్లల వేటపాలెం

తల్లిదండ్రులు ఎవరో తెలియని అనాథ పిల్లలు వీధులలో ఎలా బ్రతుకుతున్నారు? వారు ఎలాంటి పరిస్థితులను ఎదుర్కొని సంఘంలో జీవన పోరాటం చేస్తున్నారు? చివరికి వారి భవిష్యత్ నేరమయంగా ఎందుకు మారుతోంది? అనే నేపథ్యంలో క్రైమ్ థ్రిల్లర్‌గా ఈ చిత్రాన్ని రూపొందించామని దర్శకుడు నంది వెంకటరెడ్డి తెలిపారు. హనీ, ప్రణి ఫిలిమ్స్ పతాకంపై నంది వెంకటరెడ్డి దర్శకత్వంలో ఎవిఆర్ రూపొందించిన ఈ చిత్రంలో ప్రశాంత్, లావణ్య, శిల్ప ప్రధాన తారాగణంగా నటించారు. అన్ని కార్యక్రమాలు పూర్తిచేసుకుని విడుదలకు సిద్ధమైంది. ఈ సందర్భంగా నిర్మాత మాట్లాడుతూ, మంచి మెసేజ్‌ను సమాజానికి అందించాలన్న ఈ చిత్రంలో అన్ని కమర్షియల్ ఎలిమెంట్స్ ఉన్నాయని, దండుపాళ్యం చిత్రం గుర్తుకు వస్తుందని, మంచి కథ మనస్సుకు హత్తుకునే సన్నివేశాలు చిత్రంలో ఉన్నాయని, పాటలు ప్రతి ఒక్కరికీ నచ్చుతాయని ఆయన తెలిపారు. ఈ చిత్రానికి కెమెరా: డి.యాదగిరి, సంగీతం: ఎ.ఆర్.సన్నీ, పాటలు: నర్ల రామకృష్ణారెడ్డి, మాటలు: గణేష్ ముత్యాల, కథ, స్క్రీన్‌ప్లే, దర్శకత్వం: నంది వెంకటరెడ్డి.