థూ
Published Sunday, 29 December 2019ఔను
నేను నేనే
నాకు జీవం లేదు
ద్రవ్యరాశి కొలమానం ఉంది
నా సృష్టికి
మూలం శోధించినా
దొరకట్లేదు
నన్ను మాత్రం
విరివిగా విచ్చలవిడిగా
ఎక్కడపడితే అక్కడ
జుర్రుకుంటున్నారు
పైకి ఇసిరిన రాయి
గురుత్వాకర్షణ శక్తి కన్నా
ఎక్కువ నా ఆకర్షణ
న్యూటన్ నన్ను
పరిగణనలోకి తీసుకుంటే
ఇంకెన్నో విశేషాలు
నాకై నిరీక్షణ
నేనో ఆదాయ వనరు
సహజ వనరులున్నా
నాకై అర్రులు చాచే
చచ్చేదాకా నా సాంగత్యంలో
నాకు చలనం లేదు
నన్ను బంధిస్తారు
నన్ను బిగిస్తారు
అవసరమైనప్పుడల్లా నాలో మునకేస్తారు
మళ్లీ కట్టేస్తారూ
పురాణాల నుండి
చరిత్ర దాటి
వర్తమానం దాకా
నేనిలా దాసోహమై
నా దాసులని చేసుకున్నా
నాకొరిగిందేమీ లేకున్నా
నేనో తరగని వనరులా
దినదినాభివృద్ధి పథంలో
నేను లేనిది రాజ్యం లేదు
నేను లేని ఊరు లేదు
నా ఉనికికి ప్రమాదమే లేదు
తరతరాలుగా నేనున్నా
ముందు తరాలు సైతం
నా వెంట
ప్రతి ఘోరకృత్యానికి
నన్ను సాకును చేస్తుంటే
బంధనాలు తెంచుకుని
రాజ్యంపై తుపుక్కున
ఉమ్మేయాలన్పిస్తుంది
ఐనా తుడిచేసుకుంటుందేమో
సిగ్గూ ఎగ్గూలేని రాజ్యం
నేనే మద్యాన్ని.