జీవితాన్ని గెలవాలి
Published Saturday, 24 August 2019మనసు వికసిస్తే
మాట పరిమళిస్తుంది
సౌజన్యం వెల్లివిరుస్తుంది
భావం సార్వత్రికమైతే
ఆలోచన విస్తరిస్తుంది
అవగాహన విస్తృతవౌతుంది
కోపాన్ని నియంత్రిస్తే
వివేచన చొరవ తీసుకొంటుంది
బుద్ధి వికసిస్తుంది
నమ్మకాలకు నిజాల అవసరం వుంది
ఎందుకంటే అవి నిజమో కాదో తేలాలి గనక
నిజాలకు నమ్మకాలతో పనిలేదు
ఎందుకంటే నమ్మినా నమ్మకపోయినా
నిజం నిజమే గనుక
నిర్ణయాలను అభిప్రాయాలు నిర్దేశించలేవు
ఎందుకంటే అవి ఎపుడూ సందిగ్ధాలే గనక
మనసెపుడూ ఒంటరి పోరాటమే చేస్తుంది
తనది కాని మాటను అది ఎన్నడూ తలకెక్కించుకోదు
కష్టాన్నైనా, సుఖాన్నైనా అది ఒంటరిగానే భరిస్తుంది.
*
ఇలా ఎన్నో
మనిషికి తప్పని జీవిత పాఠాలు
మనసుకు వదలని ఆటుపోట్లు
జీవితాన్ని పరికించాల్సింది
ఇలాంటి వాస్తవిక దృక్కోణాల నుంచే కదా
జీవితాన్ని మలచుకోవాల్సింది
ఇలాంటి సార్వత్రికమైన
హేతుబద్ధ సోపానాల మీంచే కదా
జీవితాన్ని నడిపించాల్సింది
దృఢతరమైన ఇలాంటి సంకల్పాల
సాధనలోంచే కదా!
వాస్తవాల్ని కాదని
ఏ మనుగడా సాగింది లేదు
మనుగడలోకి వెళ్లకుండా
ఏ వాస్తవమూ బయటపడింది లేదు
మనకు కావలసింది
మనల్ని గెలిచే జీవితాలు కాదు
మనం గెలిచే జీవితాలు
గెలుచుకొన్న జీవితంలో
గొప్పతనం ఉంటుంది
ఆ గొప్పతనం వెనుక సంతృప్తి ఉంటుంది
మన గెలుపునకు బహుమతిగా
ఆ సంతృప్తే మిగులుతుంది.