అంతే!(సండేగీత)
Published Saturday, 22 December 2018కొంతమంది న్యాయబద్దంగా పని చేస్తూ ఉంటారు.
ఎలాంటి అవినీతికి తావులేకుండా పని చేస్తూ ఉంటారు.
మరి కొంతమంది ఇతరులకి సహాయం చేస్తూ ఉంటారు.
అవినీతిమయమైన ఈ సమాజంలో నీతిబద్ధంగా, న్యాయబద్ధంగా వుండటం కష్టమైన పని.
మోచేతులతో ఇతరులని నెట్టుకుంటూ ప్రయాణం చేస్తున్న ప్రపంచంలో కాసింత దయతో బ్రతకడం కూడా కష్టమే.
న్యాయబద్ధంగా, ధర్మంగా, దయగా వుండటం వల్ల ఏమిటీ లాభం అంటున్న వ్యక్తులు మన చుట్టూ వుంటారు.
నిరుత్సాహపరుస్తూ ఉంటారు.
మీ ఒక్కడి వల్ల ఏమవుతుందీ అని మనల్ని వెనక్కి లాగుతూ ఉంటారు.
నీతిగా వుండటం వల్ల మనకు ఎలాంటి గుర్తింపూ రాకపోవచ్చు.
అనుకున్న చోటికి బదిలీ కాకపోవచ్చు.
కానీ తప్పదు.
మనం అదే విధంగా ఉండాలి.
మంచి చేస్తూనే బతకాలి.
ఆశావహంగా వుండాలి.
మనం గుర్తుంచుకోవాల్సింది ఒక్కటే.
మనం గుర్తింపు కోసం చేయడం లేదు.
మనం మంచిదని భావించాం కాబట్టి చేస్తున్నాం.
అంతే!
మనం నీతిగా వుండాలని అనుకున్నాం
కాబట్టి
నీతిగా వుంటున్నాం.
కాసింత దయతో వుండాలని అనుకుంటున్నాం.
కాబట్టి
అలా వుంటున్నాం.
అంతే!