శ్రీహరికోట: నెల్లూరు జిల్లాలోని సతీష్‌ధవన్ అంతరిక్ష కేంద్రం(షార్) నుంచి పొలార్ శాటిలైట్ లాంచ్ వెహికల్-సీ29(పీఎస్‌ఎల్వీ-సీ29) నింగిలోకి దూసుకెళ్లింది. సోమవారం ఉదయం ప్రారంభమైన కౌంట్‌డౌన్ ప్రక్రియ నిరంతరాయంగా కొనసాగి ఈ సాయంత్రం నిప్పులు చిమ్ముతూ నింగిలోకి దూసుకెళ్లింది. సింగపూర్‌కు చెందిన ఆరు ఉపగ్రహాలను పీఎస్‌ఎల్వీ-సీ 29 మోసుకెళ్తుంది.

హైదరాబాద్ : అసెంబ్లీ సమావేశాలలో ప్రైవేటు వర్శిటీ బిల్లును ప్రవేశపెట్టనున్నట్లు ఏపీ ఆర్థిక మంత్రి యనమల రామకృష్ణుడు తెలిపారు. అసెంబ్లీ సమావేశాల నిర్వహణపై మంత్రివర్గ సమావేశం జరిగింది. సమావేశం వివరాలను మంత్రి విలేకరులకు వివరించారు. మనీలాండరింగ్ బిల్లును ప్రవేశపెట్టాలని నిర్ణయించినట్లు తెలిపారు. అలిగే కాల్‌మనీ వ్యవహరంపై హైకోర్టు విశ్రాంత న్యాయమూర్తితో విచారణ జరిపించనున్నట్లు తెలిపారు.

హైదరాబాద్: డ్వాక్రా రుణాలు మాఫీ కాకపోవడం వల్లే కాల్ మనీ ఆగడాలు పెరిగాయని ఆంధ్రప్రదేశ్ కాంగ్రెస్ కమిటీ ముఖ్య అధికార ప్రతినిధి గంగా భవాని అన్నారు. బుధవారం హైదరాబాద్ లో గంగాభవాని విలేకర్లతో మాట్లాడుతూ చంద్రబాబు, ఆయన కుమారుడు లోకేష్ అండతోనే టీడీపీ నేతలు కాల్ మనీ అరచకాలకు పాల్పడుతున్నారని విమర్శించారు.

హైదరాబాద్, డిసెంబర్ 15: దక్షిణ మధ్య రైల్వే పింఛన్‌దారుల సమస్యలను పరిష్కరిస్తామని అదనపు జనరల్ మేనేజర్ ఎస్‌ఎన్ సింగ్ హామీ ఇచ్చారు. మంగళవారం సికిందరాబాద్‌లోని రైల్వే నిలయంలో 30వ పెన్షన్ అదాలత్ జరిగింది. ఈ కార్యక్రమంలో పాల్గొన్న సింగ్ మాట్లాడుతూ రిటైరయిన కార్మికుల కుటుంబాలు పింఛన్‌పై ఆధారపడి ఉంటారని వారికి ఎలాంటి ఇబ్బందులు కలుగకుండా చెల్లింపులు జరగాలని అకౌంట్స్ విభాగం అధికారులను అదేశించారు.