న్యూఢిల్లీ: ఢిల్లీ జెఎన్‌యులో గత వారం చోటుచేసుకున్న వివాదానికి సంబంధించి ముగ్గురు యువకుల కోసం పోలీసులు లుక్‌అవుట్ నోటీసులు జారీ చేశారు. వర్శిటీలో జాతివ్యతిరేక నినాదాలు ఇచ్చినట్టు వారిపై అభియోగం నమోదైంది. ఫారిన్ రిజనల్ రిజిస్ట్రేషన్ ఆఫీసు(ఎఫ్‌ఆర్‌ఆర్‌ఓ)కు ఢిల్లీపోలీసులు సమాచారం అందించారు.

రాయపూర్: ప్రధాని నరేంద్ర మోదీ ఆదివారం చత్తీస్‌గఢ్ పర్యటన సందర్భంగా ఆయన పర్యటించే రాయపూర్, రాజ్‌నందన్‌గావ్ జిల్లాల్లో కట్టుదిట్టమైన బహుళ అంచెల భద్రతను ఏర్పాటు చేశారు. ప్రధాని మోదీ రాజ్‌నందన్‌గావ్ జిల్లాలోని కుర్రుభట్ గ్రామంలో ‘రూర్‌బన్ మిషన్’ కార్యక్రమంతో పాటు పలు కార్యక్రమాలను ప్రారంభిస్తారు. రాష్ట్ర నూతన రాజధాని నయా రాయపూర్‌లో సైతం ఆయన పలు కార్యక్రమాల్లో పాల్గొంటారు.

శ్రీనగర్: జమ్మూ-కాశ్మీరులో ఉగ్రవాదులు మరోసారి పంజా విసిరారు. పంపోర్ వద్ద శనివారం శ్రీనగర్-జమ్మూ రహదారిలో సిఆర్‌పిఎఫ్ కాన్వాయ్‌పై దాడికి పాల్పడటంతో ముగ్గురు జవాన్లు మృతిచెందారు. మరో పది మంది గాయపడ్డారు. వీరిలో ఒక సాధారణ పౌరుడి పరిస్థితి విషమంగా ఉన్నట్లు తెలుస్తోంది.

చండీగఢ్: ఒబిసి కేటగిరీలో రిజర్వేషన్లు కల్పించాలన్న డిమాండ్‌తో హర్యానాలో ఆందోళనకు దిగిన జాట్‌లు శనివారం మరింత రెచ్చిపోయారు. ఉద్యమాన్ని తీవ్రం చేస్తూ పెద్దఎత్తున విధ్వంసకాండకు దిగడంతో పోలీసులు జరిపిన కాల్పుల్లో ఐదుగురు మృతి చెందారు. మరోవైపు జాట్‌ల డిమాండ్లను ప్రభుత్వం అంగీకరించిందని, ఆందోళన విరమించాలని హర్యానా సిఎం మనోహర్‌లాల్ ఖట్టర్ చేసిన విజ్ఞప్తిని జాట్ నేతలు తిరస్కరించారు.