గౌహతి: అస్సాం శాసనసభలో మొత్తం 126 స్థానాలకు ఎన్నికలు జరపగా ఎక్సిట్ పోల్స్ అంచనాలకు తగ్గట్టు బిజెపి తొలిసారిగా అధికారాన్ని కైవసం చేసుకుంది. బిజెపికి 88, కాంగ్రెస్‌కు 22, ఎయుడిఎఫ్‌కు 13, ఇతరులకు 3 స్థానాలు దక్కాయి. ఎన్నికల్లో గెలిచిన ప్రస్తుత కేంద్రమంత్రి శర్వానంద సోనోవాల్ ముఖ్యమంత్రి కానున్నారు.

తిరువనంతపురం: కేరళ అసెంబ్లీ ఎన్నికల చరిత్రలో బిజెపి తొలిసారిగా ఓ అసెంబ్లీ స్థానంలో విజయం సాధించింది. నెమోమ్ నియోజకవర్గంలో ఆ పార్టీ అభ్యర్థి ఓ.రాజగోపాల్ గెలుపొంది ఈ ఘనతకు కారణమయ్యారు. మరికొన్ని నియోజకవర్గాల్లోనూ బిజెపి గట్టి పోటీ ఇచ్చింది. ఈసారి ఆ పార్టీకి ఓట్ల శాతం కొంతమేరకు మెరుగైంది. తొలిసారిగా కేరళలో తమ పార్టీ అభ్యర్థి గెలిచినందుకు ప్రధాని మోదీ ట్విట్టర్‌లో ఆనందం వ్యక్తం చేశారు.

దిల్లీ: అయిదు రాష్ట్రాల అసెంబ్లీ ఎన్నికల్లో ప్రజలు ఇచ్చిన తీర్పును తాము శిరసావహిస్తామని కాంగ్రెస్ ఉపాధ్యక్షుడు రాహుల్ గాంధీ గురువారం ట్విట్టర్‌లో పేర్కొన్నారు. వివిధ రాష్ట్రాల్లో గెలిచిన పార్టీలను ఆయన అభినందించారు. కాంగ్రెస్ విజయం కోసం కృషి చేసిన నాయకులు, కార్యకర్తలకు ఆయన కృతజ్ఞతలు తెలిపారు.

చెన్నై: డిఎండికె పార్టీ అధ్యక్షుడు, సినీ నటుడు కెప్టెన్ విజయ్‌కాంత్ ప్రభావం తమిళనాడు ఎన్నికల్లో ఈసారి నామమాత్రంగా లేకుండా పోయింది. సాక్షాత్తూ ఆయనే ఉలుందూర్‌పెట్టైలో తొలిరౌండ్ నుంచి వెనుకబడే ఉన్నారు. ఇక్కడ డిఎంకె అభ్యర్థి వసంతవేల్ ఆధిక్యతలో ఉన్నారు. మిగతాచోట్ల కూడా ఎక్కడా విజయ్‌కాంత్ పార్టీ ప్రభావం చూపలేకపోతోంది.