డెహ్రాడూన్, మే 27: తనను రాజకీయంగా ఎదుర్కొనలేకే సిబిఐను కేంద్రం ఉసిగొల్పుతోందని ఉత్తరాఖండ్ ముఖ్యమంత్రి హరీశ్ రావత్ ధ్వజమెత్తారు. తన ప్రభుత్వాన్ని పడగొట్టాలని చూసి భంగపడ్డ ఎన్‌డిఏ ప్రభుత్వం సిబిఐను పావుగా వాడుకుంటోందని శుక్రవారం ఇక్కడ విరుచుకుపడ్డారు.‘బిజెపి, నరేంద్ర మోదీ ప్రభుత్వం రాజకీయ ప్రయోజనాల కోసం సిబిఐని వాడుకుంటోంది. ఈ కుట్రలను ఎలాతిప్పికొట్టాలో మాకు తెలుసు’అని రావత్ స్పష్టం చేశారు.

దిల్లీ: ప్రధానమంత్రిగా నరేంద్ర మోదీ రెండేళ్ల పాలన పూర్తయిన నేపథ్యంలో కేంద్ర మంత్రివర్గంలో మార్పులు, చేర్పులు జరిగే అవకాశాలున్నాయని బిజెపి అధ్యక్షడు అమిత్ షా శుక్రవారం ఇక్కడ మీడియాకు సూచన ప్రాయంగా తెలిపారు. మంత్రుల పనితీరును బేరీజు వేసి మోదీ తన క్యాబినెట్‌లో మార్పులు చేస్తారని ఆయన చెప్పారు.

పాట్నా: పంచాయితీ ఎన్నికల సందర్భంగా బిహార్‌లో శుక్రవారం ఉదయం నుంచి అక్కడక్కడా హింసాత్మక సంఘటనలు చోటుచేసుకుంటున్నాయి. నలందా జిల్లా కంచన్‌లో బిజెపి, ఆర్‌జెడి కార్యకర్తలు ఘర్షణ పడి పరస్పరం రాళ్లు రువ్వుకున్నారు. తర్వాత తుపాకులను కూడా పేల్చారు. ఈ విషయం తెలుసుకుని పరిస్థితిని చక్కదిద్దేందుకు వెళ్లిన పోలీసులు కూడా రాళ్లదాడిలో గాయపడ్డారు. గాయపడిన వారిని నలందాలోని ప్రభుత్వ ఆస్పత్రికి తరలించారు.

కోల్‌కత: తృణమూల్ కాంగ్రెస్ పార్టీ అధినేత్రి మమతా బెనర్జీ పశ్చిమబెంగాల్ ముఖ్యమంత్రిగా శుక్రవారం మధ్యాహ్నం ప్రమాణ స్వీకారం చేశారు. రాజ్‌భవన్‌కు బదులు రెడ్‌రోడ్‌లో ప్రత్యేకంగా ఏర్పాటు చేసిన వేదికపై ఆమెతో పాటు 41 మంది మంత్రులు ప్రమాణం చేశారు. రాష్ట్ర గవర్నర్ కేసరినాథ్ త్రిపాఠీ వీరి చేత ప్రమాణం చేయించారు. ఈసారి మంత్రివర్గంలో 17 మంది కొత్తవారికి ఆమె అవకాశం కల్పించారు.