ముంబయి: మాలెగావ్‌ పేలుళ్ల కేసులో నిందితురాలిగా ఉన్న సాధ్వి ప్రజ్ఞ సింగ్‌ ఠాకూర్‌కుజాతీయ దర్యాప్తు ఏజెన్సీ(ఎన్‌ఐఏ) ప్రత్యేక కోర్టు మంగళవారం బెయిల్‌ నిరాకరించింది. సాధ్వి ప్రజ్ఞకు వ్యతిరేకంగా ఆధారాలు లభించకపోవడం వల్ల ఆమెపై ఎలాంటి కేసు నమోదు చేయలేదని ఎన్‌ఐఏ వెల్లడించింది. ఆమె బెయిల్‌ పిటిషన్‌పైనా తమకు ఎలాంటి అభ్యంతరం లేదని ఎన్‌ఐఏ జూన్‌ 6న స్పష్టంచేసింది.

దిల్లీ: దేశ రాజధానిలోని జంతర్ మంతర్ వద్ద తెలంగాణ సిఎం కెసిఆర్ ధర్నా చేస్తే తాము స్వాగతిస్తామని కేంద్ర న్యాయశాఖ మంత్రి సదానంద గౌడ అన్నారు. కేంద్ర ప్రభుత్వంపై కెసిఆర్ విమర్శలు చేయడం తనకు విస్మయం కలిగించందని ఆయన మంగళవారం తెలిపారు. హైకోర్టు విభజన విషయమై కేంద్రమంత్రి బండారు దత్తాత్రేయ తనను కలిసిన సందర్భంగా గౌడ ఈ వ్యాఖ్యలు చేశారు. హైకోర్టు విభజన అనేది తన పరిధిలో లేదన్నారు.

దిల్లీ: అణు సరఫరాదారుల బృందం (ఎఎస్‌జి)లో భారత్ చేరికకు చైనా మద్దతు ఇవ్వనందుకు నిరసనగా ఆ దేశానికి చెందిన వస్తువులను ప్రజలంతా బహిష్కరించాలని స్వదేశీ జాగరణ్ మంచ్ పిలుపునిచ్చింది. చైనాకు నిరసనగా మంగళవారం ఇక్కడ మంచ్ కార్యకర్తలు ఆందోళనకు దిగారు. చైనా రాయబార కార్యాలయం వద్ద నిరసనకు దిగిన ఆందోళనకారులను చెదరగొట్టేందుకు పోలీసులు ప్రయత్నించడంతో కొంతసేపు ఉద్రిక్తత ఏర్పడింది.

చెన్నై: శాంతి భద్రతలపై ప్రజల్లో నమ్మకం సడలిపోకుండా గట్టి చర్యలు తీసుకోవాలని తమిళనాడు ముఖ్యమంత్రి జయలలిత పోలీస్ శాఖ ఉన్నతాధికారులను ఆదేశించారు. ఆమె మంగళవారం పోలీస్ బాస్‌లతో సమావేశమై రాష్ట్రంలో శాంతి భద్రతల విషయమై ఆరా తీశారు.