సన్నీలియోన్ ప్రధాన పాత్రలో హిందీలో రూపొందించిన ‘రాగిణి ఎంఎంఎస్-2’ చిత్రాన్ని రాత్రి పేరుతో అనువాదం చేస్తున్నారు. భూషణ్ పటేల్ దర్శకత్వంలో రూపొందిస్తున్న ఈ చిత్రంలోని బేబీ డాల్ పాట సూపర్‌హిట్ అయింది. దీంతో ఈ చిత్రం దక్షిణాది భాషల్లో కూడా రానుంది. సుమారు 8 కోట్లమంది ఈ పాటను యూట్యూబ్‌లో చూసినట్లు లెక్కలు చెబుతున్నాయి.

శ్రీ క్రియేటివ్స్ ఫిలింస్ పతాకంపై నిఖిత, సంజన, ఉత్తేజ్, చిన్నా ప్రధాన తారాగణంగా శివగంగరాజు ఉడుమూడి దర్శకత్వంలో ఎ.కె.శ్రీకాంత్ అంగళ్ళ రూపొందించిన చిత్రం ‘అపార్ట్‌మెంట్’. ఈ చిత్రానికి సంబంధించిన ఆడియో ఇటీవల విడుదలై మంచి ఆదరణ పొందుతోందని దర్శకుడు తెలియజేశారు.

నిత్యామీనన్, దుల్కర్ సల్మాన్ జంటగా ఎస్.కె.పిక్చర్స్ పతాకంపై అన్వర్ రషీద్ దర్శకత్వంలో రూపొందిన ‘జతగా’ చిత్రాన్ని నిర్మాత సురేష్ కొండేటి అందిస్తున్నారు. ఈ చిత్రానికి సంబంధించిన సెన్సార్ కార్యక్రమాలు పూర్తయ్యాయి. ఈ సందర్భంగా నిర్మాత మాట్లాడుతూ, సెన్సార్‌బోర్డు యు/ఎ సర్ట్ఫికెట్ అందించిందని, మలయాళంలో విజయవంతమైన ‘ఉస్తాద్ హోటల్’ను దర్శకుడు సందేశాత్మక కథనంతో అందమైన ప్రేమకథా చిత్రంగా మలిచారని అన్నారు.

అశోక్ చంద్ర, రాజా సూర్యవంశీ, తేజారెడ్డి, కారుణ్య ప్రధాన తారాగణంగా శ్రీనివాసా ఫిలింస్ పతాకంపై టి.కరణ్‌రాజ్ దర్శకత్వంలో ఎస్.పి.నాయుడు రూపొందిస్తున్న చిత్రం ‘ఇదో ప్రేమలోకం’. ఈ చిత్రానికి సంబంధించిన షూటింగ్ పూర్తిచేసి నిర్మాణానంతర కార్యక్రమాలు జరుపుతున్నారు.