రాష్ట్రీయం
ఏరులైన ఊళ్లు
S ,7 à 8 RSCA (si SASPAS) et 6 cialis pharmacie cialis rapports de stage.
అమరావతి, ఆగస్టు 17: కృష్ణానదీ పరివాహక లంక గ్రామాలు ఏర్లను తలపిస్తున్నాయి.. వరదనీరు చుట్టుముట్టడంతో రాకపోకలకు తీవ్ర అంతరాయం ఏర్పడింది. వరద ప్రభావిత ప్రాంతాల్లో జన జీవనం స్తంభించింది. గత మూడు రోజులుగా వ్యవసాయ, ఉద్యానవన పంటలు నీట నానుతున్నాయి. శనివారం మధ్యాహ్నానికి ప్రకాశం బ్యారేజీ నుంచి దిగువకు 7లక్షల 78వేల 223 క్యూసెక్కుల నీటిని విడుదల చేయగా, సాయంత్రానికి వరద ప్రవాహం కొంచెం తగ్గు ముఖం పట్టింది. ఎన్డీఆర్‌ఎఫ్, ఎస్డీఆర్‌ఎఫ్, అగ్నిమాపక దళాలు వరద సహాయ చర్యల్లో నిమగ్నమయ్యాయి. కృష్ణా జిల్లాలో 41 పునరావాస కేంద్రాల్లో 10వేల మంది, గుంటూరు జిల్లాలోని 15 కేంద్రాల్లో 5వేల మంది, విజయవాడ మునిసిపల్ కార్పొరేషన్ పరిధిలో 13 పునరావాస కేంద్రాల్లో 4వేల 176 మంది ఆశ్రయం పొందుతున్నారు. రెండు జిల్లాల్లో వెయ్యికి పైగా గృహాలు పూర్తిగా దెబ్బతిన్నాయి. మరో నాలుగువేల ఇళ్లలో వరద నీరు ప్రవహిస్తోంది. ప్రభుత్వ ప్రాథమిక అంచనాల ప్రకారం కృష్ణాజిల్లాలో 2839 హెక్టార్లలో, గుంటూరు జిల్లాలో 2472 హెక్టార్లలో వ్యవసాయ పంటలు నీట నానుతున్నాయి. రెండు జిల్లాల్లో రెండువేల హెక్టార్లకు పైగా ఉద్యానవన పంటలకు నష్టం వాటిల్లింది. కూరగాయలు, పండ్ల తోటల రైతాంగం దిక్కుతోచని స్థితిలో ఉన్నారు. 20 హెక్టార్లలో పట్టు పరిశ్రమ దెబ్బతింది. అధికార యంత్రాంగం నిర్వాసితులకు ఆహార పొట్లాలు, మంచినీరు అందజేస్తున్నారు. అంటు వ్యాధులు ప్రబలకుండా రెండు జిల్లాల్లో 54 వైద్య శిబిరాలు ఏర్పాటు చేశారు. కృష్ణాజిల్లాలోని 18 మండలాల్లో 24 గ్రామాలు, గుంటూరు జిల్లాలోని 14 మండలాల్లో 12 గ్రామాలను వరద నీరు చుట్టుముట్టింది. వరద తగ్గుముఖం పట్టటంతో పునరావాస కేంద్రాలకు తరలివచ్చేందుకు లంక గ్రామాల ప్రజలు నిరాకరిస్తున్నారు. ఇదిలా ఉండగా అమెరికా పర్యటనలో ఉన్న ముఖ్యమంత్రి వైఎస్ జగన్‌మోహన్‌రెడ్డి వరద పరిస్థితిపై అధికారులను అడిగి తెలుసుకున్నారు. సహాయ కార్యక్రమాల్లో ఎలాంటి జాప్యం జరగరాదని ఆదేశించారు. ఆయనకు సీఎంఒ అధికారులు నివేదిక పంపారు. ముంపు ప్రాంతాల్లో చేపడుతున్న సహాయ చర్యలను సమీక్షించారు. ఎక్కడైనా గండ్లు పడితే యుద్ధ ప్రాతిపదికన పూడ్చాలని ప్రజలకు అవసరమైన సహాయ, సహకారాలు అందించాలని సూచించారు. అవసరమైతే పొరుగు జిల్లాల నుంచి బోట్లు తెప్పించాలని అధికారులను ఆదేశించారు. వరద ప్రభావిత ప్రాంతాల్లో పంటల పరిస్థితిని అధికారులు వివరించారు. ఇప్పటి వరకు వరద కారణంగా రెండు జిల్లాల్లో ఇరువురు మృతి చెందారని సీఎం దృష్టికి తెచ్చారు. ప్రాణనష్టం జరక్కుండా కట్టుదిట్టమైన చర్యలు తీసుకోవాలని మత్స్యకారుల కుటుంబాలకు అండగా నిలవాలని సీఎం ఆదేశించారు.
చిత్రం... వరద నీటిలో విజయవాడలోని శివారు ప్రాంతం
Related Articles
శ్రీశైలం: శ్రీశైల మహాక్షేత్రంలో శ్రీ భ్రమరాంబ, మల్లికార్జున స్వామివార్లకు పరోక్ష ఆర్జిత సేవలను ప్రవేశపెట్టినట్లు ఈఓ రామారావు తెలిపారు. సోమవారం ఎమ్మెల్యే శిల్పా చక్రపాణిరెడ్డి, ఈఓ పరోక్ష ఆర్జితసేవలో పాల్గొన్నారు.
విజయవాడ, ఏప్రిల్ 13: రాష్ట్రంలో కోవిడ్-19 నివారణ చర్యల్లో భాగంగా వైఎస్సార్ టెలీమెడిసిన్‌ను ముఖ్యమంత్రి జగన్మోహన్ రెడ్డి ప్రారంభించారు. తాడేపల్లిలోని సీఎం క్యాంప్ కార్యాలయంలో ఆయన సోమవారం ఈ సేవలను లాంఛనంగా ప్రారంభించారు. ఇందులో భాగంగా టోల్ ఫ్రీ నెంబర్ - 14410ని అందుబాటులోకి తెచ్చారు.
విజయవాడ, ఏప్రిల్ 13: కరోనా ప్రభావంతో గత 20రోజులుగా వారణాసి పుణ్యక్షేత్రంలో చిక్కుకుపోయిన వెయ్యి మంది తెలుగు యాత్రికులు ఎట్టకేలకు దాదాపు 20 బస్సుల్లో సోమవారం బయలుదేరి వస్తున్నారు. ఆదివారం అర్ధరాత్రి దాటిన తర్వాత 12 బస్సులు, సోమవారం ఉదయం మరో 8 బస్సులలో వారు స్వరాష్ట్రాలకు బయలుదేరినట్లు సమాచారం.
విశాఖపట్నం, ఏప్రిల్ 13: కరోనా నేపథ్యంలో విధించిన లాక్‌డౌన్ కారణంగా విశాఖలో చిక్కుకున్న జపాన్ దేశానికి చెందిన పలువురు సోమవారం నగరం నుంచి బయలుదేరారు. లాక్‌డౌన్‌కు ముందు విశాఖ చేరుకున్న ఆరుగురు జపాన్ దేశస్తులు కరోనా కారణంగా అంతర్జాతీయ విమాన సర్వీసులు రద్దు కావడంతో విశాఖలో చిక్కుకుపోయారు.
తిరుపతి: ఆధ్యాత్మిక క్షేత్రం తిరునగరిలో భక్తుల గోవింద నామస్మరణలు లేవు. వాహనాల శబ్ధాలు లేవు....రైలు కూతలు లేవు.వీధుల్లో జనసంచారం లేదు. దుకాణాలు తెరుచుకోలేదు. బ్యాంకుల్లో వ్యాపార వాణిజ్యాలు నడవలేదు. ఏ వీధిచూసినా, ఏ వాడ చూసినా రోడ్లు నిర్మానుష్యంగా మారి తిరుమల, తిరుపతిలో నిశ్శబ్దం రాజ్యమేలింది.