ప్రశంస(సండేగీత)

పొగడ్త వేరు.. ప్రశంస వేరు.. రెండింటికీ చాలా భేదం ఉంది.
పొగడ్త వల్ల మనిషి పొంగిపోయి పనికి రాకుండా పొయ్యే ప్రమాదం వుంది. ప్రశంస వల్ల మనిషి ఉత్సాహవంతుడు అయ్యే అవకాశం వుంది.
కొన్ని మంచి మాటలు ఆ వ్యక్తిలోని విశ్వాసాన్ని పెంచుతుంది. ప్రశంస లేనప్పుడు ఆత్మవిశ్వాసం తగ్గే అవకాశం వుంది.
పొగడ్త చెవిటి వాడికి కూడా వినపడుతుందని అంటారు. కానీ అతిగా పొగడటం ఎప్పుడూ మంచిది కాదు. అదే విధంగా ప్రశంసించక పోవడం అంతకన్నా మంచి కాదు.
ప్రతి ఒక్కరూ ఓ ప్రశంసని, ఓ మంచి మాటని కోరుకుంటారు. దానివల్ల వాళ్లు తమ లక్ష్యం వైపు పరుగెత్తడానికి అవకాశం ఏర్పడుతుంది. మంచిని, మంచి పనిని సాధ్యమైనంత వరకు గుర్తించాలి. వీలున్నప్పుడల్లా ఆ విషయం తెలియజేస్తూ వుండాలి.
విమర్శ కూడా అవసరమే. అది సద్విమర్శ కావాలి. అంతేకాదు. మితిమీరకూడదు. ఇతరులతో పోల్చి విమర్శించడం తగ్గించాలి.
ఓ మంచి మాట చెప్పడం ద్వారా, ఒక వ్యక్తి చేసిన మంచి పనిని గుర్తించడం ద్వారా అతను తన టాలెంట్‌ని తెలుసుకునే పరిస్థితి ఏర్పడుతుంది.
ఏదైనా మితిమించకూడదు.. ప్రశంస కూడా..