జనాంతికం - బుద్దా మురళి

అధిగో శివలోకం..!

S ,7 à 8 RSCA (si SASPAS) et 6 cialis pharmacie cialis rapports de stage.

‘అదిగో నవలోకం.. వెలసే మన కోసం
నీలి నీలి మేఘాల లీనమై...
దూర దూర తీరాలకు సాగుదాం...
ఎచట సుఖముందో ఎచట సుధగలదో
అచట మనముందామా....?’

‘‘ఏంటోయ్.. భలే హుషారుగా ఉన్నావ్! ఎచట సుఖముందో అచటకే పోదామంటున్నావ్? లేటు వేయసులో ఏమిటీ ఘాటుప్రేమ?’’
‘‘దూరతీరాలు అంటున్నావంటే ఏదో మతలబు లేకపోలేదు.. ఏంటో విషయం చెప్పు..’’
‘‘అనుకుంటాం కానీ.. అన్నీ జరుగుతాయా? ఏదో దూరతీరాలకు వెళ్లి సుఖపడదాం అనుకుంటాం.. అది అందరికీ సాధ్యం అవుతుందా?’’
‘‘నిజమే.. అందరూ రాంగోపాల్ వర్మలా బతకాలని అనుకుంటారు కానీ అది సాధ్యం కాదు. అదొక్క వర్మకే సాధ్యం కాబట్టే అతన్ని రాంగోపాల్ వర్మ అన్నారు. అందరికీ సాధ్యం ఐతే వర్మ కూడా గుంపులో గోవిందయ్యలా మిగిలిపోయేవాడు.’’
‘‘అది- ఓ తిక్క అనుకో, దానికో లెక్కుంది అనుకో.. లెక్కలేదు అనుకో.. కానీ వర్మ మాత్రం తాను బతకాలి అనుకున్నట్టు బతికేస్తున్నాడు. అదిగో నవలోకం.. అని సినిమా పాట రాసిన గీత రచయిత ఆరుద్ర కానీ పాడిన ఘంటసాల కానీ సినిమాలో నటించిన శోభన్‌బాబు, కాంచన కానీ తామనుకున్నట్టుగా నవలోకంలో జీవించలేకపోయారు . చివరికి ఏ పాత్ర కోసం ఐతే ఈ పాట రాశారో ఆ పాత్ర అయిన అభిమన్యుడు కూడా అనుకున్నట్టుగా జీవించలేదు. అర్ధాయుష్షుతోనే తనువు చాలించాడు. కానీ ఈ కాలంలో ఉన్న వర్మ తాను అనుకున్నట్టు జీవించేస్తున్నాడు. ఎంతైనా నవలోకం పౌరుడు వర్మ’’
‘‘హలో.. వర్మ ఈ లోకం పౌరుడే. అతనికి ఈ లోకం చట్టాలే వర్తిస్తాయి. అందుకే అతను తీసిన కమ్మరాజ్యంలో కడపరెడ్లు సినిమా టైటిల్ అమ్మరాజ్యంలో కడపబిడ్డలుగా మారినా విడుదలకు నోచుకోలేదు. విడుదలవుతుందో లేదో తెలియదు. పాల్ పాత్ర అలానే ఉంటుందా? తొలగిస్తారా? అన్నీ సస్పెన్స్. అతని జీవితం అతనిష్టం.. కానీ వర్మ ఎప్పుడూ చట్టానికి లోబడే ఉంటానంటాడు. లోబడే ఉంటాడు. నేను చెబుతున్నది చట్టబద్ధంగా బతికే వారి గురించి కాదు. నవలోకంలో తమకు తోచినట్టు జీవించే వారి గురించి..’’
‘‘తాను అనుకున్నట్టు జీవించడం వర్మ ఒక్కడికే సాధ్యం అనుకుంటుంటే వర్మకు సాధ్యం కాని విధంగా జీవిస్తున్న ఇంకో వర్మ ఉన్నాడా?’’
‘‘ఉన్నాడు... వర్మ జీవితంలో నిత్యం ఆనందం ఉంటే ఉండొచ్చు కానీ అతని పేరే ఆనందం.. నిత్యానందం.’’
‘‘ఓహో.. నిత్యానంద స్వామి గురించా? ఇక్కడ బతకలేక మరో దేశానికి పారిపోయిన నిత్యానందతో వర్మకు పోలికేంటోయ్?’’
‘‘చూడోయ్.. అతను పారిపోలేదు. నవలోకం నిర్మించుకుని అందులోకి అందరినీ ఆహ్వానిస్తున్నాడు. నిత్యానంద నిర్మించిన నవలోకంలో తొలి పౌరుడు ఆయనే.. వేల కోట్ల రూపాయల రుణాలు ఎగ్గొట్టి పారిపోయిన వాళ్లను చూశాం. నేరాలు చేసి పారిపోయిన వాళ్లను చూశాం. కంటికి కనిపించని మాఫియా సామ్రాజ్యాలను నిర్మించిన వాళ్లను చూశాం. కానీ సొంతంగా ఒక దేశాన్ని నిర్మించి దానికో రాజ్యంగం, పౌరసత్వం, గ్రీన్‌కార్డ్, రెడ్ కార్డులు, పాస్‌పోర్టులు ఇచ్చే వాళ్లను చూశామా? అలాంటి నవలోకం నిర్మించిన ఘనత ఒక్క నిత్యానందకే దక్కింది’’
‘‘ఇలాంటి పిచ్చిలోకాలకేముంది? ఎవడైనా నిర్మించుకుంటాడు.. అది నిలవాలి కదా?’’
‘‘నిజమే అనుకో.. వాస్తవానికి ప్రతి ఒక్కడికీ ఒక సొంతలోకం ఉంటుంది. ఆ లోకంలోనే వాళ్లు బతికేస్తుంటారు. పవన్ చూడు పార్టీ పెట్టి పదేళ్లవుతోంది. రెండు నియోజకవర్గాల్లో పోటీ చేస్తే ఒక్క చోట కూడా గెలవలేదు. తన పార్టీ నుంచి గెలిచిన ఒక్కడు కూడా ఆయన వెంట ఉండడు. ఆయన రాజకీయం ఏమిటో ఎవరికీ అర్థం కాదు. కానీ నేను తలచుకుంటే అని గొప్పలు చెబుతూ ఊహాలోకాల్లో బతికేస్తుంటారు. నేను పోటీ చేయలేదు కాబట్టి మీరు గెలిచారు అని ఒకసారి, నేను పోటీ చేశా కాబట్టి మీరు గెలిచారని మరోసారి అంటాడు. అంతేకానీ పోటీ చేసి గెలిచేది లేదు. ఆయన లోకంలో ఆయనుంటాడు. కొత్తలోకాలను నిర్మించడం వర్మతో మొదలు కాలేదు, నిత్యానందతో ముగిసేది కాదు’’
‘‘నువ్వు చెబుతుంటే గుర్తుకొస్తుంది. బహుశా చరిత్రకెక్కిన ఇలాంటి తొలి లోకం త్రిశంకు స్వర్గం కావచ్చు. ఇటు భూమిపైన, అటు ఆకాశంలో కాకుండా మధ్యలో వేలాడిన ఆ త్రిశంకు స్వర్గమే తొలి సొంతలోకం అనుకుంటా’’
‘‘అది చరిత్ర కాదు పురాణం’’
‘‘ఏదైనా కావచ్చు. కానీ తొలి కొత్తలోకం అదే. కానీ ఆ లోకం స్వతంత్రంగా ఉండలేకపోయింది. కానీ నిత్యానంద నవలోకం మాత్రం ఎంతో మందిలో కొత్త ఆశలు చిగురింపజేస్తోంది’’
‘‘నిజానికి ప్రతి ఒక్కరిలో వర్మ ఉంటాడు, నిత్యానంద ఉంటాడు. బాధ్యతలు, చట్టాలు, బంధాల వల్ల తామనుకున్న కొత్తలోకంలో నివసించలేరు. వర్మకు కూడా చట్టాలనే హద్దులు ఉన్నాయి. కానీ ఒక్క నిత్యానంద మాత్రమే తనకు చట్టాల హద్దులు లేని సొంతలోకాన్ని నిర్మించేశాడు’’
‘‘అంటే నిత్యానంద లోకంలో చట్టాలు పనిచేయవా? నిత్యానందుడు తన బోధనల్లో భాగంగా ఎంతో మంది మహిళలపై అత్యాచారం చేశాడట కదా? ఎంతోమంది కనిపించకుండా పోయారట కదా? అప్పుడెప్పుడో ఓ సినీతారతో నిత్యానందుడి అభ్యంతరకరమైన వీడియోలు బయట పడ్డాయి. ఆ కేసులేమీ విచారించరా?’’
‘‘నేరాలకు సంబంధించి, నేరస్తులకు సంబంధించి దేశాల మధ్య ఒప్పందాలు ఉంటాయి. అంటే ఇండియా-పాక్‌ల మధ్య నేరస్తుల అప్పగింతకు సంబంధించి ఒప్పందాలు ఉంటేనే పరస్పరం నేరస్తులను అప్పగించుకుని విచారించి, శిక్షించే అవకాశం ఉంటుంది’’
‘‘మరి నిత్యానంద కొత్తదేశం కైలాసానికి, ఇండియాకు మధ్య ఇలాంటి ఒప్పందం జరగాలి కదా?’’
‘‘హా..హా.. నువ్వు మరీ అమాయకుడివోయ్..’’
‘‘చూడోయ్! వేల కోట్ల రూపాయలకు బ్యాంకులను ముంచిన మాల్యా, మోడీల వంటి వారికి ఇలాంటి ఐడియాలు రాకపోవడం వల్ల రాత్రికి రాత్రి దేశం విడిచి పారిపోయారు. క్రూరుడు కాబట్టి దావూద్ ఇబ్రహీం పాకిస్తాన్‌కు వెళ్లి ఆ దేశ నైతిక మద్దతుతో అక్కడో మాఫియా సామ్రాజ్యాన్ని సృష్టించుకున్నాడు. కానీ నిత్యానంద...’’
‘‘ఆ.. నిత్యానంద..?’’
‘‘నా నేరాలకు నన్ను శిక్షించండని ఎవడైనా ఒప్పందం కుదుర్చుకుంటాడా? నిత్యానందుడి దేశంలో అతడు చెప్పిందే చట్టం. సంపన్న నేరస్తులకు నిత్యానందుడు కొత్త ప్రపంచం చూపించాడు. ఇక నేరస్తులు గుర్తు తెలియని దేశాలకు పారిపోయే బదులు నిత్యానంద దేశంలో పౌరసత్వం పొందవచ్చు. ’’
*

buddhamurali2464@gmail.com