పాలోపాఖ్యానం!

‘‘జీవితం బుద్భుద ప్రాయం’’
‘‘ఔను..!’’
‘‘జీవితం సంక్లిష్టమయం’’
‘‘ఔను..!’’
‘‘జీవితం అంటే కష్టాలు, కన్నీళ్లే కదా?
‘‘ఔను..!’’
‘‘పుట్టినప్పుడు ఏడుస్తాం, పోయేటప్పుడు ఏడిపిస్తాం. రెండు ఏడుపుల మధ్య కాలమే కదా? జీవితం అంటే’’
‘‘ఔను..!’’
‘‘బాధలు, ఏడుపులు లేని జీవితమే లేదా?’’
‘‘ఔను..!’’
‘‘నేనింత సీరియస్‌గా వేదాంతం చెబుతుంటే నువ్వేంటి? ఏం మాట్లాడినా, ఔను.. అంటూ పరధ్యానంగా ఉంటున్నావు?’’
‘‘ఔను.. పరధ్యానంలోనే ఉంటున్నాను’’
‘‘అబ్బా.. ఇంకోసారి ఔను అంటే చూడు.. నేనింతగా మాట్లాడుతుంటే నువ్వేం చేస్తున్నావ్?’’
‘‘మై ఫేవరెట్ హీరో కేఏ పాల్‌ను చూస్తున్నాను’’
‘‘నువ్వేం మనిషివిరా బాబూ! చిరంజీవినో, పవన్ కల్యాణ్, జూనియర్ ఎన్టీఆర్, మహేశ్‌బాబులను మా ఫేవరెట్ హీరో అంటారు. కాస్తా మేధావి లుక్ రావాలి అంటే ఏ రష్యా రచయిత పేరో, అమెరికా నటుడి పేరో చెప్పాలి.. కనీసం చెగువేరా పేరైనా చెప్పాలి.. కానీ మరీ కేఏ పాల్ పేరు చెబుతున్నావు’’
‘‘జీవితం అంటేనే సమస్యల మయం’’
‘‘ఈమాట ముందు నేనే చెప్పాను కదా?’’
‘‘ఔను.. సమస్యలతో క్షణక్షణం చస్తూ బతుకుతున్న మన జీవితాల్లో ఎంతో కొంత సంతోషాన్ని నింపేవాళ్లను ఏమందాం. ఆశ్చర్యపోకు... పాల్ నా జీవితంలో ఎంతోకొంత సంతోషం నింపాడు’’
‘‘నమ్మలేకపోతున్నాను. ఎంతో సీరియస్‌గా ఉండే నీలో మరో కోణం మొదటిసారి చూస్తున్నా.. మాసిన గడ్డం, నలిగిపోయి, నల్లగా మాసిన దుస్తులు, చేతిలో ఇంగ్లీష్ బుక్స్‌తో శూన్యంలోకి చూస్తూ రబ్బరు చెప్పులతో కనిపించే నిన్ను ఓ మేధావి అనుకున్నాను కానీ ... నీలో మరో మనిషున్నాడు. సోడాబుడ్డీ కళ్లద్దాల నుంచి ఈ ప్రపంచాన్ని తీక్షణంగా చూస్తున్నావనుకున్నాను. కానీ దొంగచాటుగా పాల్ వీడియోలు చూస్తున్నావని అస్సలు అనుకోలేదురా!’’
‘‘బ్రహ్మానందం తెలుసు కదా..?’’
‘‘తెలియకపోవడం ఏంటి? మనకున్న కొద్దిమంది కమెడియన్లలో అద్భుతంగా హాస్యం పండించే గొప్ప కమెడియన్.’’
‘‘ఏ హాస్యనటుడైనా నవ్వుతూ హాస్యాన్ని పండించగలడు. కానీ సీరియస్‌గా హాస్యాన్ని పండించే వాడేరా మొనగాడు! వారికో రేంజ్ ఉంటుంది. దమ్ముంటే బ్రహ్మానందాన్ని నవ్వకుండా హాస్యాన్ని పండించమను చూద్దాం. కానీ, పాల్ తాను నవ్వకుండా తన ముఖంపై నవ్వు ఏ మాత్రం కనిపించకుండా ఎంత సీరియస్‌గా హాస్యాన్ని పండిస్తాడో?’’
‘‘అంటే- చార్లీ చాప్లిన్ కన్నా..?’’
‘‘మనలో ఆత్మన్యూనతా భావం ఇంకా పోలేదు. మనల్ని పాలించిన తెల్లవాడి కన్నా మనం గొప్పవాళ్లం అంటే మన మనసు అస్సలు ఒప్పుకోదు. చాప్లిన్ మన కన్నా ముందు తానే నవ్వుతాడు. పాల్ ఎప్పుడైనా అలా నవ్వగా చూశావా? అప్పుడెప్పుడో పాత సినిమాల్లో అంజిగాడు, రేలంగి, పద్మనాభం, రాజబాబు అంటూ ఏవేవో పేర్లు గొప్పగా చెబుతారు కానీ వీళ్లలో ఎవరైనా నవ్వకుండా పాల్‌లా సీరియస్‌గా హాస్యాన్ని పండించగలరా?’’
‘‘ఏమోరా! ఎంత చెప్పినా నేను కన్విన్స్ కావడం లేదు. ఇంతకూ జీవితం కష్టాల మయం కావడానికి, పాల్‌కు సంబంధం ఏమైనా ఉందా?’’
‘‘నది వద్దకు మనం చెంచాతో వెళితే చెంచా నీళ్లు ముంచుకోవచ్చు. అదే బిందెతో వెళితే బిందెడు నీళ్లు తెచ్చుకోవచ్చు. ఈ ప్రపంచమనే సముద్రం కూడా అంతే- మనం ఏం కావాలంటే? ఎంత కావాలంటే అంత తీసుకోవచ్చు’’
‘‘అస్సలు అర్థం కాలేదు’’
‘‘నీకీ ప్రపంచం అంతా బాధామయంగా కనిపిస్తోంది. మరి నాకు హాస్యంతో నవ్వుకోవడానికి అవసరమైనంత పెద్దగా కనిపిస్తోంది. అంటే ఈ ప్రపంచం నుంచి ఎవరికి కావలసింది వాళ్లు తీసుకోవచ్చు. నీకు కావలసిన ఏడుపు, బాధలను నువ్వు తీసుకో.. నాకు కావలసిన హాస్యాన్ని నేను తీసుకుంటున్నా..’’
‘‘అదేమైనా సంతలో సరుకా? కావలసినంత తీసుకోవడానికి?’’
‘‘చూసే కళ్లుండాలి కానీ పిండుకోవడానికి ఈ ప్రపంచంలో హాస్యానికి కొదవే లేదు. ప్రపంచాన్ని మార్చేస్తానంటూ పాల్ సీరియస్‌గా చేసే ఉపన్యాసం నుంచి నేను బోలెడు హాస్యాన్ని పిండుకున్నాను. అప్పుడెప్పుడో ఓ మహిళా ఎమ్మార్వోపై దాడి చేసిన చింతమనేని అనే ఆయన ఈ మధ్య బెయిల్‌పై విడుదలై, ప్రభుత్వం అప్రజాస్వామికంగా వ్యవహరిస్తోందని అన్నాడు.. విన్నావా?’’
‘‘ఔను.. విన్నాను’’
‘‘నువ్వు పార్టీల కోణంలో విన్నావు. అతనే పార్టీ? ఏ పార్టీ ప్రభుత్వం అరెస్టు చేసింది? అంటూ నువ్వు సీరియస్‌గా ఆలోచించావు. మరి నేను ఆనాడు ఎమ్మార్వోను కొట్టిన దృశ్యాలు, ఇపుడు ఆయన చేసిన ప్రసంగంలో అప్రజాస్వామికం అనే పదాన్ని ఎలా ఉచ్చరించాడో విని బోలెడు హాస్యాన్ని పిండుకున్నాను.’’
‘‘అంటే పాల్ అభిమానిని అంటావు?’’
‘‘కాదు- ఇప్పుడు అభిప్రాయం మారింది. వర్మ సినిమాలో పాల్ పాత్రలో నటించిన నటుడు భలేగా నచ్చేశాడు.’’
‘‘ఇప్పుడే పాల్ అన్నావు. ఇప్పుడేమో పాల్ పాత్రధారి అంటున్నావు’’
‘‘పాల్ ఐతేనేం, పాల్ పాత్రధారి ఐతేనేం? విక్రమార్కుడి సింహాసనం మీద కూర్చున్న పశువుల కాపరి కూడా విక్రమార్కుడిలా న్యాయం చెప్పిన కథ చిన్నప్పుడు చదివాం కదా? ఇదీ అంతే- విక్రమార్కుడి సింహాసనానికి కూడా అంత పవర్ ఉన్నట్టు. పాల్ పేరులోనే అంత పవర్ ఉంది. ఆ నటుడిని పాల్ ఆవహించినట్టు లేదు. ’’
‘‘నీకు పాల్ పిచ్చి పట్టుకున్నట్టుంది..’’
‘‘పాల్ పవరే అంత.. కమ్మరాజ్యంలో కడపరెడ్లు అంటూ ఇప్పుడు సజీవంగా ఉన్న రాజకీయ పాత్రలతోనే సినిమా తీసిన వర్మ- ఆ మాట చెప్పడానికి ధైర్యం చేయడం లేదు. కానీ పాల్ విషయానికి వచ్చే సరికి- ఒక్క పాల్ తప్ప మిగతావన్నీ కల్పిత పాత్రలే, కొన్ని పోలికలు ఉంటే అవి కేవలం యాధృచ్చికమే అన్నారు. దీన్ని బట్టి నీకేమర్థమైంది?’’
‘‘అది కూడా నువ్వే చెప్పు?’’
‘‘వర్మ కూడా పాల్ అభిమాని. పాల్ హాస్యం అంటేనే అంత- ఎంతటి వాడైనా అభిమానించాల్సిందే. సీరియస్ హాస్యాన్ని ఆస్వాదించాల్సిందే. నిత్యం సమస్యలతో సతమతమవుతున్న మన కోసం ఆ దేవుడే పాల్‌ను పంపించాడేమో! ఆర్థిక సంక్షోభం, నిరుద్యోగం, అధిక ధరలు, ఊడుతున్న ఉద్యోగాలు, ఉగ్రవాదం.. ఇన్ని సమస్యల మధ్య మనం నవ్వుకోగలుతున్నాం అంటే- ?’’
‘‘అంతగా మురిసిపోకు. పాల్‌కు గట్టి పోటీ వస్తోంది. చాలా మంది నాయకులు పాల్‌ను మించిపోవాలని చూస్తున్నారు.’’
*