జనాంతికం - బుద్దా మురళి

అదీ కథ..!

S ,7 à 8 RSCA (si SASPAS) et 6 cialis pharmacie cialis rapports de stage.

‘‘ఛ..ఛ.. ఈ మనుషులకు ఎప్పుడూ బుద్ధి లేదు.. ఇదేం దేశం? ఇలాగేనా పాలించేది? అమెరికాను దాటి పోవలసిన మనం ఇంకా అభివృద్ధి చెందుతున్న దేశంగానే ఉండడం అంటే తప్పెవరిది? ఇంకెంత కాలం నెహ్రూ విధానాలు, ఇందిర గాంధీ స్టైల్? ఇప్పటికైనా మారాలి.. లేదంటే ప్రపంచం ముందుకు వెళుతుంది, మనం వెనక్కి వెళతాం. చంద్రమండలాన్ని స్వాధీనం చేసుకుని సూర్యలోకంపై జెండా పాతితే ప్రపంచంలో మనకు ఎదురే లేదు’’
‘‘ఎవరోయ్ మూర్తీ.. మీ ఇంట్లో అంత ఆవేశంగా మాట్లాడుతున్నది?’’ ‘‘ఇంకెవరు? మా అబ్బాయి.. నీకు తెలుసు కదా? మా వాడికి సామ్యవాదం మొదలు కొని సామ్రాజ్య వాదం వరకు, నారీభేరీ మొదలుకుని థర్డ్ జెండర్ సమస్యల వరకు తెలియని అంశమంటూ లేదు. సైన్స్ నుంచి ఐటీ వరకు, శాంతి మంత్రం నుంచి యుద్ధ తంత్రం వరకు మావాడికి తెలియనిది లేదనుకో. ఇంకో విషయం.. మొన్న మనువును చీల్చి చెండాడాడు. వేదాల్లో తప్పులు వెతికి పట్టుకున్నాడు..’’
‘‘మనువు ఎవరోయ్? మీ ఆవిడ తమ్ముడా? మేనమామ దగ్గర ఎవరికైనా ఆ మాత్రం చనువు సహజమేలే’’
‘‘మనువంటే మా బావమరిది కాదోయ్. మా బావమరిది పేరు మనోజ్. అప్పుడే మరిచిపోయావా? మనువు వేరు, మనోజ్ వేరు. మనువు అని చాలా పూర్వం ఒకడుండేవాడు లే! వాడెవరో నాకూ సరిగా తెలియదు లే’’
‘‘ఏదీ.. ఒకసారి మీ అబ్బాయిని పిలువు..’’
‘‘ఏరా.. అంకుల్ వచ్చాడు ఒకసారి ఇటురా..!’’
‘‘ఛ..ఛ.. డాడీ.. నీకు కనీసం మ్యానర్స్ లేకుండా పోతోంది. రోజు రోజుకూ మర్యాద లేకుండా పోతోంది. నేను సీరియస్‌గా టిక్‌టాక్ చేస్తుంటే నువ్వేంటి డాడీ.. ఏదో కొంపలు మునిగిపోతున్నట్టు పిలిచావు. తొక్కలో అంకుల్ వస్తే అదేదో ట్రంప్ వచ్చాడన్నంత బిల్డప్ ఇస్తున్నావు’’
‘‘ఏమనుకోకోయ్.. మావాడు ఏదో ప్రేమతో తెలుగు సినిమాల్లోలా మర్యాద లేకుండా మాట్లాడతాడు.. అంతేకానీ నిజంగా నీ మీద కోపంతో కాదు’’
‘‘తొక్కలో అంకుల్ అని ఎంత ముద్దుగా పిలిచావు బాబూ.. ఇంకా నయం చెత్తనా.. అని పిలువ లేదు’’
‘‘ఏంటో త్వరగా చెప్పండంకుల్.. నేను టిక్‌టాక్‌లో బిజీ’’
‘‘టిక్‌టాక్ అంటే ఏంటి బాబూ?’’
‘‘ఏ కాలంలో ఉన్నారు అంకుల్? ఒకప్పటి బాలకృష్ణ సినిమాలో టైం మిషన్‌లో శ్రీకృష్ణ దేవరాయల కాలంలోకి వెళ్లినట్టు మీరు పాత రాతి యుగంలోనే ఉండిపోయినట్టున్నారంకుల్.. టిక్‌టాక్ అంటే తెలియని మనుషులు కూడా ఉంటారా అంకుల్?’’
‘‘ఏదో మనుషులుగానే పుట్టి, మనుషులుగానే పెరిగి, మనుషులుగానే మిగిలిపోవడం వల్ల కొన్ని విషయాలు తెలియవుబాబూ..’’
‘‘ఐ లైక్ దిస్ ఫ్రాంక్‌నెస్ అంకుల్. మీ అజ్ఞానాన్ని నిజాయితీగా ఒప్పుకున్నారు’’
‘‘ఏం చదువుతున్నావు బా బూ..?’’
‘‘మావాడి తెలివి తేటలు అపారం. బీటెక్‌లో చెప్పే చదువులను మావాడు చిన్నప్పుడే చదివేశాడు. అందుకే టైం వెస్ట్ అనుకుని కాలేజీకి ఎక్కువగా వెళ్లలేదు. మావాడి తెలివి తేటలు చూసి కుళ్లుకున్న లెక్చరర్లు నాలుగేళ్ల ఇంజనీరింగ్ కోర్సులో అన్ని సబ్జెక్ట్‌ల్లోనూ ఫెయిల్ చేశారు. జీనియస్‌లను తొలుత ప్రపంచం ఇలానే చిన్నచూపు చూస్తుందని నాకు తెలుసు. తన తెలివికి సరిపోని కాలేజీతో పనేంటని మావాడు ఇంట్లోనే ఉంటున్నాడు’’
‘‘ఏరా! మీవాడి తెలివి గురించి, లెక్చరర్లు కుళ్లుకోవడం గురించి నీకు మీవాడే చెప్పాడా? నువ్వు గ్రహించావా?’’
‘‘మావాడే చెప్పాడు’’
‘‘అంటే- ఇంజనీరింగ్‌లో ఫెయిల్ అయ్యానంటావ్ అనికదా బాబూ..’’
‘‘అంకుల్.. ఫెయిల్ అని అలా నెగిటివ్‌గా ఎందుకు మాట్లాడతారు. అప్పట్లో ఐన్‌స్టీన్ లాంటి మేధావిని చదువురాదు అని ఇంటికి పంపారు. అలా ఇంటికి పంపిన టీచర్ పేరు ప్రపంచానికి గుర్తు లేదు. కానీ ఐన్‌స్టీన్ పేరు ప్రపంచానికి తెలుసు. నేను కూడా అలాంటి మేధావినే అంకుల్. నా మేధస్సును వారు గుర్తించలేదు. ఏదో ఒకరోజు ఈ ప్రపంచం నా మేధస్సును గుర్తించి తీరుతుంది అంకుల్’’
‘‘ఎలా బాబూ? నీ మేధస్సును ప్రపంచం ఎలా గుర్తిస్తుంది.. టిక్ టాక్‌తోనా?’’
‘‘ఏదో ఒకరోజు ప్రపంచం నివ్వెరపోయేట్టు విజయం సాధిస్తాను అంకుల్. అప్పటి వరకు ఈ తొక్కలో ప్రపంచం నన్ను గుర్తిస్తే ఎంత ? గుర్తించక పోతే ఎంత?’’
‘‘ఈ ప్రపంచం నిన్ను ఎలా గుర్తు పెట్టుకోవాలని అనుకుంటున్నావు?’’
‘‘తొక్కలో ప్రపంచం నన్ను గుర్తు పెట్టుకున్నా, గుర్తు పెట్టుకోక పోయినా నాకు ఫర్వాలేదు. ప్రపంచాన్ని నేనే గుర్తించడం లేదు. నన్నో పనికి మాలిన శుంఠ అనుకుంటే నాకు మరింత సంతోషం’’
‘‘బాబూ.. ఇలా దగ్గరకు రా! మీ నాన్న వినలగడు. నీ చెవిలో చెబుతాను. నీకు ఓడ్కా తాగే అలవాటు ఉంది కదూ’’
‘‘ఔనంకుల్.. మీకెలా తెలుసు?’’
‘‘నీలో రాంగోపాల్ వర్మ స్టైల్ కనిపిస్తుంటేనూ’’
‘‘ఏరా! మా అబ్బాయితో ఏదో రహస్యంగా మాట్లాడుతున్నావు. మా వాడి మేధస్సు చూస్తే నీకే కాదు, ఎవరికైనా దిమ్మ తిరగాల్సిందే. ఏమంటావు?’’
‘‘నిజమే.. మీవాడు నిజంగా మేధావే? ఇప్పటికే మేధావిగా బాగా ముదిరిపోయాడు. మంచి డాక్టర్‌కు చూపించు’’
‘‘అర్థం కాలేదు..’’
‘‘సాధారణంగా పెన్షన్ మీద బతికే వారికి చివరి దశలో మేధో జబ్బు వస్తుంది. ప్రపంచాన్ని తలకిందులుగా చూస్తారు. ప్రపంచానికి తప్పు అనిపించింది.. వీరికి రైట్ అనిపిస్తుంది. ప్రపంచమంతా రైట్ అన్నది వీరికి తప్పుగా కనిపిస్తుంది. మనుషులు, ప్రపంచమే కాదు.. చివరకు గ్రహాలు, భూమి, సూర్యచంద్రులు- ఏదీ ఇలా ఉండడం వారికి నచ్చదు. మరోలా ఉండాలని వాదిస్తారు. ప్రపంచం తలకిందులుగా ఉండాలని వాదించినా, భూమిని బల్లపరుపుగా మార్చేస్తానని చెప్పినా, ఏం చేసినా నెల నెలా బ్యాంక్ అకౌంట్‌లో పెన్షన్ ఆగిపోయే ప్రమాదం ఉండదు కాబట్టి వారికి ఇబ్బంది లేదు. కానీ మీవాడు ఇంకా చదువే పూర్తి చేయలేదు. అప్పుడే మేధావి అయిపోయాడు. మీవాడికి మేధో జబ్బు చేసింది. దానికి చికిత్స లేదు, నివారణ ఒక్కటే మార్గం.’’
*

buddhamurali2464@gmail.com