జనాంతికం - బుద్దా మురళి

ఏదైనా కావచ్చు..!

S ,7 à 8 RSCA (si SASPAS) et 6 cialis pharmacie cialis rapports de stage.

‘‘బయటపడవు కానీ- నువ్వూ యాక్టర్ల ఫ్యాన్‌వే’’
‘‘అలా కనిపిస్తున్నానా? ఎందుకలా అడిగావ్?’’
‘‘యూ ట్యూబ్‌లో నువ్వు చూస్తున్న వీడియోలు నాకు కనిపించాయిలే’’
‘‘ఓ అదా.. నిజమే.. హీరోలెవర్నీ అభిమానించను కానీ నాగబాబు ఇష్టం’’
‘‘ఓహో.. జబర్దస్త్ అభిమానివి కదూ’’
‘‘కాదు.. నాగబాబు అభిమానిని, అంతకు ముందు రాంగోపాల్ వర్మ అభిమానిని కూడా’’
‘‘ఎప్పుడో చూసిన శివ సిన్మా కోసం ఇంకా అభిమానిస్తావా? మరి నాగబాబు..’’
‘‘చెప్పాను కదా? నాకు తెలిసినంత వరకు అప్పుడు వర్మ, ఇప్పుడు నాగబాబు మాత్రమే ధైర్యంగా మాట్లాడుతున్నారు. అందుకే అభిమానం ’’
‘‘తావలచింది రంభ, తాను మునిగింది గంగ అని ఊరికే అనలేదు. నీ అభిమానం అలాంటిదే’’
‘‘వాళ్లు చెప్పిన విషయాలను మనం ఏకీభవించక పోవచ్చు, వ్యతిరేకించవచ్చు.. మొన్న రాజకీయాల గురించి వర్మ వీడియో చూశాను. ఎంత పేలవంగా ఉన్నాయో రాజకీయాలపై ఆయన అభిప్రాయాలు అని నవ్వుకున్నా. ’’
‘‘ఇప్పుడే అభిమానిస్తానని అన్నావు, అప్పుడే పేలవంగా ఉన్నాయంటున్నావు. నిన్ను నువ్వే విమర్శించుకుంటున్నావా?’’
‘‘అభిప్రాయాన్ని ఖండించడం వేరు. ధైర్యంగా అభిప్రాయాలను వెల్లడించడాన్ని అభిమానించడం వేరు.’’
‘‘దేన్ని ఖండిస్తున్నావో, దేన్ని స్వాగతిస్తున్నావో చెప్పు’’
‘‘రాజకీయాల్లో ఎప్పుడు ఏది జరగాలో అది జరిగిపోతుందట. ఆ సమయంలో అధికారంలో ఉన్న వారి వల్లే అనుకుంటాం కానీ అది కాదంటూ రాజకీయాల గురించి వర్మ చెప్పుకొచ్చాడు. అంతా దేవుడే చేస్తాడనే దానికి, ఈ అభిప్రాయానికి పెద్ద తేడా లేదు. వర్మ లేకపోయినా ఆ కాలంలో శివ సినిమా అలానే వచ్చేది అంటే ఎలా ఉంటుందో ఈ అభిప్రాయం అంతే. కాలంతో పాటు ఆ కాలంలో నాయకులు తీసుకునే నిర్ణయాలు సైతం ఫలితాలపై ప్రభావం చూపుతాయి. పీవీ, మన్మోహన్ సింగ్ ఆ కాలానికి లేకపోతే ఆర్థిక సంస్కరణలు వచ్చేవి కావు. ఆర్థిక సంస్కరణలతో ఆ నేతలకు సంబంధం లేదనుకోవడం తప్పు. ఆ కాలం నాటి పరిస్థితులతో పాటు అప్పటి నాయకులు సైతం నిర్ణయాల్లో కీలక భూమిక పోషిస్తారు.’’
‘‘మరి- ఖండిస్తూ అభిమానం అంటావు’’
‘‘అభిమానించిన కారణం వేరు, ఖండించిన విషయం వేరు. సినిమా రంగంలో ఒకరికొకరు భజన చేసుకోవడమే కానీ ధైర్యంగా మనసులో మాట చెప్పేవారున్నారా? అ పని చేస్తున్నందుకు వర్మ అంటే అభిమానం. ’’
‘‘మరి నాగబాబు..?’’
‘‘జబర్దస్త్‌పై నీకేదో కసి ఉన్నట్టు, వ్యతిరేకత ఉన్నట్టు నటించకు.. నువ్వు తప్పకుండా చూస్తావని నాకు తెలుసు. సీఎం కుమారుడు పది మంది వంట వాళ్లను వెంట పెట్టుకుని దావోస్ వెళ్లి మన వంటల రుచులు వారికి చూపిస్తే, అపర కుబేరుడు పొంగి పోయాడట! వేలకోట్ల పెట్టుబడులు తెచ్చాడట!’’
‘‘ట..ట..ట! అన్నీ టాటాలేనా? విషయం చెప్పు’’
‘‘దీనిపైనే నాగబాబు సెటైర్‌గా వీడియో విడుదల చేశాడు. భజన చేస్తున్నారని భజన చేసి చూపించాడు. లక్ష మంది సభ్యులు ఉన్నారు. నువ్వు ఒక్క వీడియో తీయిస్తే నేను అలాంటివి రోజూ విడుదల చేస్తానంటున్నాడు. ’’
‘‘దీంట్లో అభిమానించడానికేముంది?’’
‘‘ఎన్టీఆర్ లాంటి మహానటుడే చివరి రోజుల్లో మీడియా నా గొంతు కోసిందని కుమిలిపోయాడు. అలాంటిది మీడియాపై వీడియోలు విడుదల చేయడం అంటే- అతని ధైర్యాన్ని అభిమానిస్తున్నాను.. అంతే కానీ అతని నటనను కాదు, సామాజిక వర్గాన్ని కాదు. ’’
‘‘దీన్ని వల్ల కంపు పట్టిపోదా?’’
‘‘అందరి జాతకాలూ బయటపడతాయి. ఒక వర్గం జాతకాలే బయటపడినప్పుడే మరో వర్గం ప్రయోజనం పొందేది. ఇప్పుడు అందరి జాతకాలు బయటపడినప్పుడు మొదట్లో కంపు అనిపిస్తుంది. హాలాహలాన్ని చూసి భయపడిపోవద్దు. తరువాత వచ్చే అమృతం గురించి ఆలోచించు. ’’
‘‘సందట్లో సడేమియా అని దివ్యవాణి కూడా రంగప్రవేశం చేసినట్టు ఉంది’’
‘‘లోకేశ్‌ను పప్పు అంటే బ్రాహ్మణులను అవమానించినట్టే అని ఆమె ఆవేశపడిన వీడియోలు కామెడిగా ఉన్నాయిలే. ఆ మాటల్ని అంత సీరియస్‌గా తీసుకుంటే ఎలా?’’
‘‘బాగా గుర్తు చేశావ్! పనిలో పనిగా ఆమె ఏ కులం వంటకాలు ఏవో చెబితే బాగుండేది. వంటలకు కులాల వారీగా పేటెంట్ హక్కులిస్తే ఎలా ఉంటుంది?’’
‘‘ముందే చెబుతున్నా! పేటెంట్ హక్కు ఎవరికి వచ్చినా? ఎవరు కోర్టుకు వెళ్లినా నేను మాత్రం పచ్చిపులుసును వదిలేది లేదు. పచ్చిపులుసు, చింతకాయ తొక్కు, సర్వపిండి లేని జీవితం జీవితమే కాదు. కులాల వారిగా పేటెంట్ ఇస్తే సర్వపిండి, పచ్చిపులుసు ఎవరికి దక్కవచ్చు అంటావ్’’
‘‘దివ్యవాణిని అడిగి చెబుతాను. నాకు తెలిసినంత వరకు మా అమ్మనే మొట్టమొదట పచ్చిపులుసు, సర్వపిండి చేసింది. పేటెంట్ మా అమ్మకే దక్కుతుంది’’
‘‘నాకు తెలిసినంత వరకు మా అమ్మనే మొదటి సారి ఈ రెండూ చేసింది’’
‘‘మనలో మనకు గొడవ ఎందుకు? అందరి అమ్మలు మొదటి సారి చేశారు’’
‘‘ఈ చానళ్లు అస్సలు నచ్చడం లేదు. విలువలతో కూడిన కొత్త చానల్ రావలసిన అవసరం ఉంది’’
‘‘త్వరలోనే నీ కోరిక తీరవచ్చు’’
‘‘కొత్త చానల్ వస్తుందా? ఎవరిది?’’
‘‘శిఖా చౌదరి, రాకేశ్‌రెడ్డిల భాగస్వామ్యంలో కొత్త చానల్ వస్తుందని నా సిక్స్త్ సెన్స్ బలంగా చెబుతోంది’’
‘‘తమాషాగా ఉందా?’’
‘‘నేను సీరియస్‌గా చెప్పినా తమాషా అంటావ్.. ఉమ్మడి రాష్ట్రంలో అవసరమైతే తెదేపా, కాంగ్రెస్‌లు కలుస్తాయని చెబితే వెటకారానికి కూడా హద్దు ఉండాలంటూ నన్ను మందలించావు. అది నిజమైంది కదా?’’
‘‘ గొంతు సంగతి తెలియదు కానీ ఇద్దరి రూపం మాత్రం టీవిలో విలువల గురించి చెప్పడానికి బాగా సూట్ అవుతుంది. ఫోటో జెనిక్ ఫేస్‌లు’’
‘‘గొంతుదేముంది? టీవీలకు రూపం ముఖ్యం. సినిమాల్లో హీరోయిన్లకు ఇతరులతో డబ్బింగ్ చెప్పించినట్టు టీవీలో తొలిసారి డబ్బింగ్ చెప్పిస్తే అదో రికార్డుగా నిలిచిపోతుంది. కొత్త పుంతలు తొక్కుతున్నామని చెప్పవచ్చు’’
‘‘మృతుడు తనను తానే పొడుచుకుని చనిపోయాడని తేలవచ్చు.. వారిద్దరూ కలిసి కొత్త చానల్ తేవచ్చు. ఏదైనా సాధ్యమే!’’
*

buddhamurali2464@gmail.com