ఇటలీ: సెంట్రల్ ఇటలీలో భారీ భూకంపం సంభవించి, ఇద్దరు చనిపోయారు. ఇల్లు కూలిపోవడంతో పలువురు గాయపడ్డారు. రిక్టర్ స్కేలుపై 6.2గా నమోదైన భూకంప ప్రభావానికి అమెట్రిసే పట్టణంలో భారీగా నష్టం సంభవించి ఉండవచ్చని ప్రాథమిక అంచనా. సహాయ కార్యక్రమాలు ప్రారంభించిన ఇటలీ ప్రభుత్వం శిథిలాల కింద చిక్కుకున్న వారిని కాపాడేందుకు ప్రయత్నిస్తోంది.

కరాచీ: పాకిస్థాన్ లోని బలూచిస్తాన్ నాయకులపై పోలీసులు కేసులు నమోదు చేశారు. స్వాతంత్య్ర దినోత్సవం సందర్భంగా ప్రధాని మోదీ చేసిన వ్యాఖ్యలకు మద్దతిచ్చిన బ్రహందాగ్ బుగ్తీ, హర్బియార్, బనుక్ కరీమాపై దేశద్రోహంతో పాటు పలు సెక్షన్ల కింద ఖుజ్దర్‌లోని పోలీస్ స్టేషన్లలో ఐదు కేసులు నమోదయ్యాయి.

గజియాన్‌టెప్ (టర్కీ), ఆగస్టు 21: టర్కీలో ఇస్లామిక్ స్టేట్ (ఐఎస్) ఉగ్రవాదులు జరిపిన బాంబు దాడిలో 50 మంది మృతి చెందారు. సిరియా సరిహద్దుల్లో ఉన్న ఆగ్నేయ టర్కీలోని గజియాన్‌టెప్ నగరంలో ఒక వివాహానికి హాజరైన ప్రజలను లక్ష్యంగా చేసుకొని ఈ దాడి జరిగిందని అధికారులు ఆదివారం తెలిపారు. స్థానిక కాలమానం ప్రకారం శనివారం రాత్రి అనేక మంది ఖుర్దులు హాజరయిన వివాహ కార్యక్రమంలో సంభవించినట్టు పేర్కొన్నారు.

టోక్యో: జపాన్‌లో వరుసగా రెండో రోజు శనివారం భారీ భూకంపం సంభవించింది. జపాన్‌ ఉత్తర ప్రాంతంలో మియాకో నగరానికి 167కి.మీ.ల దూరంలో భూకంపం వచ్చినట్లు అమెరికా జియోలాజికల్‌ సర్వే తెలిపింది. ఈరోజు సంభవించిన భూకంపం తీవ్రత రిక్టర్‌ స్కేలుపై 6.0గా నమోదైందని అధికారులు వెల్లడించారు. భూకంపం కారణంగా సునామీ హెచ్చరికలు లేవని జపాన్‌ మెట్రోలాజికల్‌ ఏజెన్సీ స్పష్టంచేసింది.