ఎవరు ఎప్పుడు ఏ పార్టీలోకి వలస వెళతారో తెలియక, రాజకీయాలంటేనే ప్రజల్లో ఇప్పుడు ఏహ్యభావం నెలకొంది. అయితే, అధికారంలో ఉన్నా లేకున్నా కేంద్రమంత్రి వెంకయ్య మాత్రం క్రమశిక్షణకు మారుపేరుగా నిలుస్తున్నారు. ఆయన ఏ సభలో పాల్గొన్నా వేదికపై ఉన్నవారు, సభికులు నిశ్శబ్దంగా ఉండాల్సిందే. ముఖ్య వ్య క్తులైనా, ఇతరులైనా అటూ ఇటూ కదలడానికి కూడా అవకాశం ఉండదు.

కొంతమంది వాక్చాతుర్యం ఇతరులను ఇట్టే దిగ్భ్రమకు గురిచేస్తుంది. కాంగ్రెస్ నేత జానారెడ్డి ‘ఏదైతే ఉందో..’ అంటూ మొదలు పెట్టి, సుదీర్ఘంగా మాట్లాడినా ఆ యన ఉపన్యాసం ఏదైతో ఉందో ఎవరికీ అర్థం కాదు. ‘ఇంత దారుణమా?’ అని ఆశ్చర్యపోయేవాళ్లకు ఆయన మాటతీరే అంత అన్పిస్తుంది. ఇలాగే, కాస్త నోరుజారి వెంటనే మాట మార్చిన ఏపి స్పీకర్ కోడెల శివప్రసాద్‌పై బిజేపి నేతలు దుమ్మెత్తి పోస్తున్నారు.

పవన్‌కల్యాణ్ సినిమాల్లో పంచ్ డైలాగులకు కొదవుండదు. అలాగే, ఆయన రాజకీయ ఉపన్యాసంపై సామాజిక మాధ్యమాల్లో అంతకు మించిన పంచ్ డైలాగులు పేలుతున్నాయ. తమిళనాట జరిగిన జల్లికట్టు ఉద్యమం స్ఫూర్తితో ఏపికి ప్రత్యేక హోదా కోసం ఉద్యమించాలని పవన్ పిలుపు ఇచ్చారు. తీరా ఆయనే విశాఖ బీచ్‌కు వెళ్లలేదు. కానీ, తెలంగాణకు చెందిన చిన్న హీరో సంపూర్ణేష్ బాబు విశాఖ వెళ్లి ఉద్యమానికి మద్దతు ప్రకటించారు.

అసెంబ్లీలో తమ పార్టీ సభ్యులు పాండవుల పాత్రను పోషిస్తున్నారని, తాను ధర్మరాజుగా వ్యవహరిస్తున్నానని సిఎల్‌పి నేత కె. జానారెడ్డి మీడియా మిత్రులను నవ్వించారు. ‘మీలో భీముడు జీవన్‌రెడ్డేనా?’ అని ఓ విలేఖరి ప్రశ్నించగా, సందర్భాన్ని బట్టి తమ పాత్రలు మారుతుంటాయని, తాను మాత్రం ఎప్పటికీ ధర్మరాజునేనని తేల్చిచెప్పారు.