విజయవాడ: ఇంద్రకీలాద్రిపై కనకదుర్గమ్మ ఆలయ కార్యనిర్వహణాధికారి (ఇఓ)గా చంద్రశేఖర ఆజాద్ శుక్రవారం బాధ్యతలు చేపట్టారు. అర్చకులతో వివాదం ఫలితంగా ఇఓ నరసింగరావును సెలవుపై వెళ్లాలని రాష్ట్ర ప్రభుత్వం ఆదేశించిన నేపథ్యంలో ఆజాద్ బాధ్యతలు చేపట్టారు. అమ్మవారిని దర్శించుకున్న అనంతరం ఆయన విలేఖరులతో మాట్లాడుతూ, ఆలయంలో అర్చకుల వివాదం సమసిపోయినట్లేనని, అందరినీ కలుపుకుని పోతూ తాను పనిచేస్తానని తెలిపారు.

విజయవాడ: భర్త వేధింపుల నుంచి తనను కాపాడాలని కోరినా పోలీసులు పట్టించుకోవడం లేదని ఆరోపిస్తూ దుర్గ అనే వివాహిత శుక్రవారం ఇక్కడి కొత్తపేట పోలీసు స్టేషన్ ఎదుట ధర్నా ప్రారంభించింది. తనకు న్యాయం జరిగే వరకూ ఆందోళన చేస్తానని ఆమె చెబుతోంది. పోలీసు స్టేషన్ మీదుగా వెళుతున్న మంత్రి పుల్లారావ్ కాన్వాయ్‌ను ఆమె అడ్డుకుంది.

తిరుమల: తిరుమలలో వెయ్యికాళ్ల మండపం నిర్మాణానికి మళ్లీ అంతరాయం కలిగింది. 2003లో వెయ్యికాళ్ల మండపాన్ని తొలగించాక, ప్రధాన ఆలయం ఎదుటే దాన్ని నిర్మించాలని గతంలో కొందరు హైకోర్టును ఆదేశించారు. పాత స్థలంలోనే మండపాన్ని నిర్మించాలని కోర్టు ఆదేశాలు జారీ చేసినప్పటికీ, నారాయణగిరి ఉద్యానవనంలో 19 కోట్లతో మండపం పనులను టిటిడి చేపట్టింది.

విజయవాడ: మైలవరం మండలం కొత్తగూడెం గ్రామంలో రేషన్ దుకాణాల నుంచి లారీలో అక్రమంగా తరలిస్తున్న 20 టన్నుల బియ్యాన్ని మార్కెట్ కమిటీ సభ్యులు శుక్రవారం ఉదయం పట్టుకున్నారు. దీనిపై రెవెన్యూ, పోలీసు అధికారులకు ఫిర్యాదు చేశారు.