గుంటూరు: ఎపిలో తీవ్ర దుర్భిక్ష పరిస్థితులు నెలకొన్నప్పటికీ రైతులు, కూలీలు, సామాన్య ప్రజలను ఆదుకునేలా ప్రభుత్వం ఎలాంటి చర్యలూ తీసుకోవడం లేదని వైకాపా అధినేత జగన్ ఆరోపించారు. ఆయన సోమవారం మాచర్లలో వైకాపా నిర్వహించిన ధర్నాలో పాల్గొన్న సందర్భంగా మాట్లాడుతూ, ఉపాధి హామీ పథకం కింద సిమెంటు రోడ్లు నిర్మిస్తున్నారని, తాగునీటి సమస్యపై దృష్టి సారించడం లేదని అన్నారు.

విజయవాడ: రాష్ట్రాన్ని దోచుకోవాలన్న ధ్యాస తప్ప ప్రజాసేవ చేయాలన్న ఆలోచన వైఎస్ జగన్‌కు ఏనాడూ లేదని ఎపి మంత్రి పల్లె రఘునాథరెడ్డి సోమవారం ఇక్కడ మీడియాతో మాట్లాడుతూ అన్నారు. ఈ కారణంనే గత ఎన్నికల్లో జగన్‌ను ప్రజలు తిరస్కరించారన్నారు. జగన్ వైఖరి వల్లే ఆయన పార్టీ ఎమ్మెల్యేలు వలసపోతున్నారని, వైకాపా నడిసముద్రంలో మునిగిపోతున్న నావ అని ఆయన వ్యాఖ్యానించారు.

విజయవాడ: ఎపి సిఎం చంద్రబాబు అధ్యక్షతన రాష్ట్ర మంత్రిమండలి సమావేశం సోమవారం ఉదయం ఇక్కడ ప్రారంభమైంది. నీటి ఎద్దడి, రాజధాని నిర్మాణం, భోగాపురం ఎయిర్‌పోర్టు పనులు, బందరు పోర్టు, రైతులకు రుణమాఫీ, ప్రభుత్వ పాఠశాలల్లో యోగా విధానం, ప్రత్యేక హోదా వంటి విషయాలపై మంత్రివర్గ సమావేశంలో చర్చించే అవకాశం ఉంది. కొన్ని కీలక నిర్ణయాలను సిఎం ప్రకటించనున్నట్లు సమాచారం.

విజయవాడ: ఆగిరిపల్లి మండలం వడ్లమాను వద్ద సోమవారం ఉదయం రెండు ఆటోలు ఢీకొన్న ఘటనలో పాతికమంది బాలలు గాయపడ్డారు. వీరిని ఆస్పత్రికి తరలించగా ముగ్గురి పరిస్థితి విషమంగా ఉందని పోలీసులు తెలిపారు.