విజయవాడ, జూన్ 24: తొమ్మిది నెలల పసిపాప జ్ఞానసాయికి వచ్చిన కష్టానికి ఏపి సిఎం చంద్రబాబు చలించిపోయారు. కాలేయ వ్యాధితో బాధపడుతున్న ఈ చిన్నారిని ఆదుకునేందుకు ఎంత డబ్బు ఖర్చయినా వెనుకాడబోమని హామీ ఇచ్చారు. ములకలపల్లి మండలం ఆర్‌ఎస్ కొత్తపల్లి గ్రామంలో నిరుపేదలైన జె రమణప్ప, సరస్వతి దంపతుల బిడ్డ జ్ఞానసాయి పుట్టిన నాటి నుంచి కాలేయ సమస్యతో బాధపడుతోంది. వైద్య శాస్త్ర పరిభాషలో బిలిరియా అట్రాసియా అంటారు.

విజయవాడ, జూన్ 24: విదేశీ పెట్టుబడుల కోసం పలు కంపెనీలతో ఒప్పందాలను ఖరారు చేసుకునేందుకు ముఖ్యమంత్రి నారా చంద్రబాబు నేతృత్వంలో ప్రతినిధి బృందం శనివారం రాత్రి ఢిల్లీ నుంచి చైనాకు బయలుదేరి వెళ్లనుంది. ఈ పర్యటన ఖర్చుల కోసం కోటి 20 లక్షలు మంజూరు చేసిన ప్రభుత్వం యుద్ధ ప్రాతిపదికన కోటి రూపాయలు విడుదల చేసింది.

కర్నూలు: ఓ వివాహితపై సామూహిక అత్యాచారం చేసిన ముగ్గురిని పోలీసులు శుక్రవారం అరెస్టు చేశారు. ఇక్కడికి సమీపంలోని ఇ.తాండ్రపాడులో ఓ మహిళపై అదే గ్రామానికి చెందిన ముగ్గురు కొద్దిరోజుల క్రితం అత్యాచారం చేశారు. ఈ విషయం చెప్పడానికి భయపడిన ఆమె తన భర్తకు చెప్పకుండా బంధువుల ఇంటికి వెళ్లింది. భార్య కోసం గాలిస్తున్న భర్తకు అసలు విషయం తెలియడంతో పోలీసులు రంగప్రవేశం చేసి ముగ్గురు నిందితులను అరెస్టు చేశారు.

విశాఖ: పశ్చిమ మధ్య బంగాళాఖాతంలో కోస్తాంధ్ర తీరంలో ఉపరితల ఆవర్తనం ఏర్పడిందని, ఇది రాబోయే 72 గంటల్లో అల్పపీడనంగా మారే అవకాశం ఉందని ఇక్కడి వాతావరణ కేంద్రం శుక్రవారం తెలిపింది. దీంతో కృష్ణా, గుంటూరు, నెల్లూరు, ప్రకాశం జిల్లాలతో పాటు రాయలసీమ ప్రాంతంలో విస్తారంగా వర్షాలు కురిసే అవకాశం ఉంది.