హైదరాబాద్,జూన్ 28: ఆంధ్రప్రదేశ్ సెంట్రల్ యూనివర్శిటీని వెంటనే మంజూరు చేయాలని కోరేందుకు శాసనసభ స్పీకర్ డాక్టర్ కోడెల శివప్రసాదరావు ఢిల్లీ వెళ్లారు. ఈ సందర్భంగా ఆయన కేంద్ర మానవ వనరుల మంత్రి స్మృతీ ఇరానితో కలిసి కేంద్రీయ యూనివర్శిటీ అంశాన్ని చర్చిస్తారు. అలాగే తన నియోజకవర్గంలో ఇందుకు స్థలం కూడా ఇచ్చేందుకు సిద్ధం చేశామని ఆయన మంత్రి దృష్టికి తీసుకురానున్నారు.

ఏలూరు, జూన్ 28: పశ్చిమ గోదావరి జిల్లాలో కక్షలు, కార్పణ్యాలకు వేదికైన పినకడిమి వివాదాల నేపథ్యంలో జిల్లా కేంద్రం ఏలూరులో మంగళవారం రాత్రి మరోసారి కిరాయి హంతకులు తెగబడ్డారు. తుపాకులతో జరిపిన కాల్పుల్లో తూరపాటి నాగరాజు అనే వ్యక్తి గాయపడ్డాడు. వ్యక్తిగత పనులపై బయటకు వెళ్లి తన స్నేహితుని వాహనంపై ఇంటికి తిరిగివెళ్తున్న నాగరాజుపై నలుగురు అగంతకులు రెండు మోటారు సైకిళ్లపై వచ్చి కాల్పులు జరిపారు.

హైదరాబాద్, జూన్ 28: అది ఏపీ ముఖ్యమంత్రి అధికార కార్యాలయం. ప్రభుత్వానికి సంబంధించి కీలక చర్చలు, నిర్ణయాలు తీసుకునే ప్రభుత్వ కేంద్రం. అక్కడ పార్టీపరమైన కార్యకలాపాలు చేయడం నిషిద్ధం. కానీ, సాక్షాత్తూ అధికార పార్టీ ఎమ్మెల్యేలే వాటిని ఉల్లంఘించి మీడియాతో సమావేశాలు ఏర్పాటు చేస్తున్నా, అడ్డుకోవలసిన సమాచార శాఖ స్వయంగా సదరు ఎమ్మెల్యేల మీడియా భేటీకి రావాలని సందేశాలు పంపిస్తున్న వైచిత్రి ఇది.

విజయవాడ, జూన్ 28: చైనా పర్యటనలో ఉన్న ముఖ్యమంత్రి చంద్రబాబు నాయుడు మంగళవారం టియాంజిన్‌నుంచి బీజింగ్ నగరానికి బులెట్ రైలులో ప్రయాణించారు. ఈ సందర్భంగా చైనాలోని రైలు కంపెనీ ప్రతినిధులతో చంద్రబాబు సమావేశమయ్యారు. అమరావతి- విశాఖ, అమరావతి- హైదరాబాద్ మధ్య ఈ బులెట్ రైళ్ళను ప్రవేశపెట్టే అవకాశాలను ఆయన పరిశీలించారు. అలాగే విశాఖ- తిరుపతి మధ్య ఒక బులెట్ రైలును నడపాలని చంద్రబాబు ఆలోచన చేశారు.